ORIENTING ekimenak amaierako hitzaldia egingo du Bruselan, 2024ko Ekonomia Zirkularraren Munduko Foroan
Hiru urte baino gehiagoko lanaren ondoren, ORIENTING proiektua amaitzear dago. Bertan lortutako emaitza guztiak aurkezteko, ORIENTINGek amaierako hitzaldia iragarri du: "Operational Life Cycle Sustainability Assessment Methodology Supporting Decisions Towards a Circular Economy". Bruselan izango da, 2024ko Ekonomia Zirkularraren Munduko Foroaren barruan.
- Amaierako hitzaldi horretan, produktuak baloratzeko garatu den eta bizi-zikloaren jasangarritasuna ebaluatzen duen metodologia operatiboaren alderdi nagusiak erakutsiko dituzte proiektuko bazkideek, bai eta ETEek metodologia hori erabiltzea eta onartzea errazteko sortutako prestakuntza-tresnak eta -materialak ere.
- Gainera, egungo eta etorkizuneko politika publikoen barruan metodologia hori aplikatzeko loturak aurkeztuko dira.
Ekitaldia bi zatitan banatuko da:
- Azken emaitzen aurkezpena (14:00 - 16:30 CEST)
- Ondoren, WCEF 2024ren barruko saio bat (17:00 -18:30 CEST), soluzio zirkular jasangarriak ebaluatzeko garatutako aplikazio-sorta erakusteko eta haietan sakontzeko.
Produktuen bizi-zikloaren jasangarritasunaren ebaluazioa
TECNALIAk koordinatutako ORIENTING ekimenaren bidez, metodologia operatibo bat garatu dugu produktuen bizi-zikloaren jasangarritasuna ebaluatzeko (LCSA). Helburu nagusia da ingurumen-, gizarte- eta ekonomia-inpaktuen analisia barne hartzen duen bizi-zikloaren ikuspegi bat txertatzea, zirkulartasun- eta kritikotasun-adierazleak sartuta.
Proiektu horren metodologia bost kasu praktikotan erakutsi da, eta, era horretan, enpresek beren jardunean aplikatu ahal izango dutela bermatzen da. Gainera, zenbait produkturi aplikatu zaie eta interesdunen komunitate zabal bati kontsultatu zaio, kontsulta-prozesu irekien bidez.
TECNALIAren eginkizuna
TECNALIAn arduratu gara proiektuan garatutako jarraibide metodologikoak eragiketa bihurtzeaz, softwarea eta datuak landuz. Hau da, kontuan hartu beharreko aldagaiak definitu ditugu, kuantitatiboki neur daitezkeen faktoreen bidez. Horrek produktuentzako lehia-baldintza ekitatiboak garatzen lagunduko du, betiere jasangarritasunari buruzko informazio sendo, garden eta egiaztagarrian oinarrituta.
Proiektuko partzuergoa
Honako hauek osatzen dute proiektuko partzuergoa: Aclima Basque Environment Cluster, Anthesis, BASF, Ecoinnovazione, Ecoinvent, Ecopreneur, Eifer, Fraunhofer, Leiblein, PRé, Solana, Stora Enso, TECNALIA, Ternua Group, Universiteit Gent, University for the Creative Arts eta VTT Teknologian Tutkimuskeskus.
**Proiektuak Europar Batasunaren ikerketako eta berrikuntzako Horizon 2020 programaren finantzaketa jaso du, 958231 zenbakiko dirulaguntzaren bidez.