KSI Berritzaile 2020 programak 34 proiektu-eskaera jaso ditu; 2019an baino % 30 gehiago

Ekainaren 12an itxi zen KSI Berritzaile 2020 programako eskaerak aurkezteko epea. Eusko Jaurlaritzako Kultura eta Hizkuntza Politika Saila du buru programak, eta Innobasque Berrikuntzaren Euskal Agentziarekin batera darama; guk kulturaren eta sormenaren sektorea digitalizatzeko ahalmena eskaintzen dugu.

Programak 34 proiektu-eskaera izan ditu, hots, 2019ko deialdian baino % 30 gehiago. Hamabi azpisektoretako eskaerak jaso dira, eta ikus-entzunezkoen sektorea (zinema, telebista, irratia, Internet) izan da horietan aktiboena.

Teknologia nagusia, berriz, errealitate areagotua izan da, eta askotariko enpresen eskutik: hasi arkitektoetatik eta magoetaraino. Proiektuak ere askotarikoak dira: edukiak katalogatzeko semantika-proiektuak; droneen kudeaketa hobetzekoak; joko serioak; moda, ekitaldi, ikuskizun eta barruko diseinurako erabilera berritzaileak dituzten mugikorreko aplikazioak; neuromarketinaren bidez hobetutako marketina eta komunikazioa, etab.

Enpresa horiek guztiek teknologiara hurbiltzeko aukera izan dute, kosturik gabe probatu ahal izan dute, eta zuzenean ikusi zer ondorio dituen digitalizazioak beren negozio-ereduetan.

Teknologia-transferentzia

KSI Berritzaile programa EAEko kultura-eta sormen-industriaren makrosektorera bideratua dago, eta bi jarduera-ardatz hauetako proiektuetarako aukeraguneak sortzea eta garatzea du helburu: berrikuntza teknologikoa, batetik, eta antolakuntza-ereduaren eta enpresa-egituraren berrikuntza, bestetik.

Lehenengo ardatzari dagokionez (Berrikuntza eta transferentzia teknologikoa), kultura- eta sormen-industriei teknologia transferitzea dagokigu, zentro teknologiko bat garen aldetik: merkatu globalagoak xede dituzten produktu eta zerbitzu berritzaileak prestatzen ditugu, eta aukera eta garapen berritzaileetarako sinergiak eta gune berriak sortzen ditugu.