TECNALIA detekzio kuantikoaren arloko ekimen aitzindari baten buru da

TECNALIA detekzio kuantikoaren arloko ekimen aitzindari baten buru da

• PROMISEren helburua da nitrogeno-hutsuneetan oinarritutako irudi kuantikoen sentsoreak industria-aurreko prestakuntza teknologikora igotzea aplikazio praktiko eta egunerokoetarako

PROMISE (PROtotypes of Magnetic Imaging Systems for Europe) detekzio kuantikoko teknologia iraultzeko diseinatutako ekimen aitzindaria da, nazioarteko partzuergo batek bultzatua. PROMISEk industrian erabiltzen diren kasuetarako proba zorrotzak egitea eta puntako teknologiak garatzea du ardatz. Haren helburua da nitrogeno-hutsuneetan (NV) oinarritutako irudi kuantikoen sentsoreak industria-aurreko prestakuntza teknologikoen (TRL7) mailara eramatea aplikazio praktiko eta egunerokoetarako.

Detekzio kuantikoan aurrera egitea etorkizuneko industrietarako

Detekzio kuantikoa da merkatu-potentzial berehalakoena duen teknologia kuantikoa, eta NVn oinarritutako sentsoreak abangoardian daude, sinpleak baitira eta errendimendu nabarmena baitute. Huts, kriogenia edo blindaje magnetikoko sistemarik gabe funtzionatzen dutenez, neurketa kuantitatibo eta absolutuak eskaintzen dituzte sentsore horiek, kalibratu beharrik gabe. Tokiko eremu magnetiko eta elektrikoekin, tenperaturarekin, deformazioarekin eta presioarekin interakzioa dutenez, informazio aberatsa eta zehatza ematen dute NV zentroek, eta ohiko sistema optikoak gainditzen dituzte.

Ekortze-zundako sistema tradizionalek, ordea, ahaltsuak izanik ere, puntuz puntuko neurketen moteltasunak eragindako eragozpena dute, eta, ondorioz, ez dira hain egokiak denbora errealeko aplikazio dinamikoetarako. PROMISEk denbora laburreko aldaketak azkar eta eraginkortasunez atzematen dituzten eremu zabaleko magnetometro industrializagarriak garatuz heldu dio erronka horri, eta, hala, aukera berriak zabaltzen ditu detektatzeko, irudiak eskuratzeko, aztertzeko eta kontrolatzeko. Gainera, lortuko diren prototipoek tamaina, pisu, energia-kontsumo eta kostu nabarmen txikiagoak izango dituzte egungo laborategi-konfigurazioek baino, eta horrek merkatuan azkar ezartzeko bidea erraztuko du.

Berrikuntza bultzatzen duen aditu-partzuergoa

PROMISE ekimenak ikerketako eta industriako adituen talde ikaragarria biltzen du:

• Teknologia-aitzindariak: TECNALIA eta TNO (NL) dira sistema berrien diseinuaren, konfigurazioaren eta proben buru, eta bermatzen dute ingurune operatibo errealen eskakizunak betetzen dituela prototipo bakoitzak.
• Sentsore aurreratuak garatzea: Fondazione Bruno Kessler (IT) fotoi bakarren oldezko diodoen pixelez osatutako arrayetan oinarritutako sentsore espezializatuak diseinatzen ari da, eta Diatope (DE) ETEa, berriz, NVko konfigurazio optimoa duten diamantezko mintzak fabrikatzen ari da neurrira.
• Datuen adimena: Tecnaliako ikaskuntza automatikoko espezialistak datuak eskuratu eta aztertzeko prozesua hobetzen ari dira, eta NV zentroen fisikari buruzko ezagutza sakonak aprobetxatzen ari dira sentsoreen errendimendua hobetzeko.
• Arauak eta ziurtapena: Italiako Metrologia Institutu Nazionalak (INRIM) diamantean oinarritutako teknologia kuantikoetan duen esperientzia ekarri du, eta diseinuak estandarizatzen laguntzen ari da, arazorik gabe industrian integratu ahal izateko.

Funtsezko industriak eraldatzea

Garatutako prototipoak askotariko egoeretan baliozkotzen laguntzeko, Graphenea Semiconductor (ES), Airbus Central Research and Technology (DE) eta MagnetFab (FR) enpresen eta bazkide akademiko baten —Euskal Herriko Unibertsitatea (ES)— kasu batzuk erabiliko dira, industria-arloan garrantzia dutenak. PROMISEk eragin nabarmena izango du funtsezko hiru sektoretan:

• Erdieroaleen metrologia: neurketa ultralasterrak eta bereizmen handikoak, hurrengo mikroelektronika-belaunaldirako funtsezkoak.
• Materialen ingeniaritza: material aurreratuak garatu eta aztertzeko irudiak prozesatzeko gaitasuna hobetzea.
• Bioteknologia: denbora errealeko kontrol-tresna dinamikoak, diagnostiko- eta ikerketa-prozesuak irauli ditzaketenak.

AMIRES, The Business Innovation Management Institute (CZ) erakundeak zainduko du PROMISEk aurreikusitako inpaktua lortzen duela, bazkideei merkaturatzeko asmo handiko ibilbide-orriak garatzen lagunduz eta emaitzak hartzaileen artean zabalduz.

Aurrerapauso handia

PROMISEk detekzio kuantiko aurreratua eta aplikazio industrial praktikoak batzen dituenez, teknologia aurrera bultzatzen du, eta, gainera, detekzio kuantikoko soluzio helduak merkaturatzeko bidea zabaltzen du. Aurrerapen horrek inoiz ez bezalako tresna azkar eta zehatzak emango dizkie industriei, eta hori aurrerapauso handia izango da irudi kuantikoaren arloan.