TECNALIA Mentes Sarearen azken edizioan parte hartzen ari da, Espainiako ekonomia karbono gutxiko ekonomia bihurtzeko trantsizioan erabakiak hartzen laguntzeko tresnak sortu eta emateko
Oraingo edizio honetan, TECNALIAren Energia Plangintzako Plataformaren koordinaziopean, guztira 5 unibertsitatek (Gaztela-Mantxako Unibertsitatea, Valladolideko Unibertsitatea, Zaragozako Unibertsitatea, Nafarroako Unibertsitate Publikoa eta Comillaseko Pontifize Unibertsitatea) eta 4 ikerketa-zentrok (CIEMAT, IMDEA-Energía, Basque Research Centre for Climate Change eta TECNALIAren Energia Plangintzako Plataforma) osatzen dute Mentes Sarea, Espainiako ekonomia karbono gutxiko ekonomia bihurtzeko trantsizioan erabakiak hartzen laguntzeko tresnak sortu eta emateko.
Energia Ekonomiarako Espainiako Elkartearen (AEEE) XX. Biltzarraren barruan egingo da Mentes Sarearen topaketa, Bilbon, ekainaren 2tik 4ra.
Mentes Sarearen helburuak
Sarearen helburua da zeinek bere ikuspegitik eta bere metodologia-hurbilketatik energia-modelizazioan lan egiten duten estatuko ikerketa-taldeak koordinatzea:
- Sarea osatuko luketen taldeen arteko osagarritasunak eta sinergiak ustiatzea.
- Taldeen ikerketa-lehentasunak lerrokatzea, herrialdeak trantsizio energetikoaren arloan dituen erronka estrategikoetara egokitzeko eta haiei erantzuteko.
- Energia-modelizazioaren arloan estatuko erreferentzia-talde bat eratzea, erabakiak hartzen parte hartzen duten eragileei eta politika-erabakitzaileei laguntzeko.
- Estatuan energia-modelizazioaren arloko gaitasunak sortzen laguntzea, sareak elkarrekin antolatutako prestakuntza-jardueren bidez, doktorego-tesiak elkarrekin zuzenduz eta doktoregaiek eta masterreko ikasleek sareko zentroetan egonaldi laburrak eginez.
- Estatuko ikerketa-taldeen nazioarteko presentzia indartzea, nazioz gaindiko sare edo ekimenetan parte hartuz.
- Estatuko eta nazioarteko I+G+B proiektuetan parte hartzea elkarrekin.
- Sarearen ikerketa-lerroen emaitzak gizarteari helaraztea, hala nola trantsizio energetikoak izango dituen inpaktuak eta deskarbonizazio-alternatibak.