TTT GROUP

TTT Groupek tratamendu termikoen eta gainazalekoen aukera zabala eskaintzen du, baita akabera-eragiketa osagarriak ere.

Zerbitzu-enpresa honek bezeroek piezak tratatzeko dituzten beharren kudeaketa integrala eskaintzen du, eta bezeroen produktuentzako soluzio teknikoen aukeraketa eta konbinazio optimoa ematen die.

Aeronautikako eta automobilgintzako merkatuen beharrei erantzuten die gehienbat, baina sektore hauetan ere presentzia handia dute, besteak beste: energia eolikoa, eguzki-energia termikokoa, makina-erreminta, ekipamendu-ondasunak, papergintza, trengintza, eta petrolioaren eta gasaren industria.

Ingurumen-erronkak gero eta nabarmenagoak diren mundu honetan, jasangarritasunak garrantzi handia du, eta materialak hobetzea funtsezkoa da. Altzairu herdoilgaitzek, nahiz eta korrosioarekiko erresistenteak izan, iraunkorragoak eta eraginkorragoak izan behar dute.

“TTT Groupen, altzairu herdoilgaitzen errendimendua hobetzeko erronkari aurre egin behar diogu, material hori askotariko erabilera duten osagaietan erabiltzen baita. Merkatuan badira altzairuen erresistentzia hobetzen duten tratamenduak, baina tratamendu horiek materialaren izaera herdoilgaitza suntsitzeko joera dute.“, esan du Ohiane Larrañagak, TTT GROUPeko Tratamendu Termikoen gerenteak.

 “Altzairuak higadurarekiko erresistenteagoak izan zitezen, gehiago iraun zezaten eta modu eraginkorragoan funtziona zezaten, altzairu herdoilgaitzaren korrosioarekiko erresistentziaren propietateei eutsiko zien tratamendu bat sortu behar zen.”, adierazi du Iñigo Braceras doktore ingeniariak, TECNALIAko Gainazalen Ingeniaritzako ikertzaileak.

 Hori dela eta, TTT GROUP eta TECNALIA elkarlanean aritu dira altzairuen gainazalean pantaila aktiboa duen plasmaren bidez nitruratzeko teknologiaren bidez aplikatzen den tratamendu espezifiko bat garatzeko.

“Prozesua garatzeko eta ebaluatzeko, “instalazio pilotu” bat sortu dugu berariaz, TTT Groupekin lankidetzan. Instalazio horrek laborategi-instalazio bat du, TTT taldearen instalazioaren antzekoa baina eskala txikian, eta han sartzen dira piezak, tratamendu hori kondizio kontrolatuetan probatzeko. Labe horrekin, tratamendua ohikoa baino tenperatura baxuagoan aplikatzea lortzen dugu, altzairuaren izaera herdoilgaitza ez suntsitzeko. “, dio Iñigo Bracerasek.

Hala, osagaiari behar duen erresistentzia ematen zaio, korrosioaren aurkako abantailak galdu gabe. Ebaluazio-prozesua egin ondoren, teknologia hori TECNALIAren instalazio pilotutik TTT GROUPen instalazio industrialetara eraman da.

Proiektuak eragin bikoitz oso positiboa izan du, bai arlo ekonomikoan, bai sozialean. Tratamendu horren bidez, TTT Groupen eta Europako industriaren lehiakortasuna hobetu da tratamendu aurreratuen bidez. Horrez gain, tratamendu hori energetikoki eraginkorragoa da, eta ez ditu erabiltzen ingurumenari kalte egiten dioten bitartekoak; hala, aldi berean lortzen da planeta zaintzea eta ekonomia jasangarriago bat bultzatzea.