"DATUETAN-IA ekimenak deskarbonizazio industrialean, jasangarritasun energetikoan eta talentu digitalaren prestakuntzan lagunduko du”
Nola integratu adimen artifiziala ekoizpen prozesuetan?
SEGULA TECHNOLOGIESekin batera ari gara lanean, adimen artifiziala (AA) ekoizpen-prozesuetan integratzeko modua iraultzea helburu duen ekimen aitzindari batean; ACERIA DE ÁLAVA, TUBACEX, SIDENOR eta AYESA erakundeek ere hartzen dute parte.
Proiektu horren helburua da euskal industrian AAren erabilera sendotzea eta areagotzea, Data-Centric eta Human in the Loop paradigmak aplikatuz.
Paradigma-aldaketa: Pertsonetan oinarritutako AA
Erronka nagusietako bat da algoritmoetan oinarritutako AA batetik datuetan eta pertsonetan oinarritutako AA batera igarotzea, funtsezko bi oinarriren arabera:
- Data-Centric: datuen kalitatea eta garrantzia lehenesten ditu kantitatearen aldean; horrela, ereduen zehaztasuna hobetzen du, baita informazio gutxiagorekin ere.
- Human-in-the-Loop: giza ezagutza aditua AA ereduen bizi-zikloan integratuz, fidagarritasuna, gardentasuna eta ulermena areagotzen ditu.
Eragina industrian eta gizartean
Proiektua funtsezko sektoreetan garatzen da, hala nola siderurgikoan. SIDENOReko eta TUBACEXeko erabilera errealeko kasuetan, eredu prediktiboak aplikatzen dira produktuaren kalitatea hobetzeko, errefusak urritzeko eta energia-kontsumoa optimizatzeko.
Espero diren onuren artean, hauek nabarmentzen dira:
- Datuak tratatzeko denbora % 50 murriztea.
- Datuak etiketatzeko giza ahalegina % 30 murriztea.
- Eredu prediktiboen errendimendua % 5 hobetzea.
- Konputazio-kostuak % 10 murriztea.
Gainera, deskarbonizazio industrialean, jasangarritasun energetikoan eta talentu digitalaren prestakuntzan lagunduko du.
Eredu esportagarria
MESIC 2025 fabrikazioko ingeniaritzari buruzko hurrengo kongresuan aurkeztuko dugu proiektua, izenburu honekin: “Industria-ereduen errendimendua hobetzea, hizkuntza-eredu handiak erabiliz datu sintetikoak sortuta: metodoei, doikuntzari eta ezagutza adituaren integrazioari buruzko azterketa sakona”.
Proiektuak, DATUETAN-IA izenekoak, helburutzat du bai parte hartzen duten enpresetan inpaktua izatea, bai beste industria eta eskualde batzuetan errepika daitekeen eredu bihurtzea. ZTBP 2030, RIS3 Euskadi eta Horizon Europe estrategiekin lerrokatua dagoenez, sendotu egiten du 5.0 Industriarako trantsizioan Europan erreferente gisa duen potentziala. Proiektua SPRIk finantzatutako Hazitek programaren barruan kokatzen da.
