"Lankidetza funtsezkoa izan da Cardiomentor-ek benetako beharrei erantzungo diela bermatzeko"
TECNALIAk kardiologiaren eraldaketa bultzatzen du, adimen artifizial sortzailearen bidez
Adimen artifizial sortzailea kardiologian erabiltzearen inguruko eztabaida Osasun Kardiobaskularraren SEC25 Kongresura iritsi da, Cardiomentor-i eskainitako saio baten bidez. Proiektu hori Eraldaketa Digitalerako eta Funtzio Publikorako Ministerioak koordinatzen du, eta Espainiako Kardiologia Elkarteak (SEC) baliozkotzen du. TECNALIAk ere parte hartzen du.
- “Cardiomentor zenbait maila eta erakunderen arteko lankidetza-proiektu bat da, eta helburutzat du prestakuntza klinikoa hobetzea, Alia adimen artifizial sortzailearen Espainiako eredua entrenatzeari eta garatzeari esker”, azaldu du Julián Pérez-Villacastín doktoreak, SECeko proiektuaren arduradunak.
Lehenengo fasean, Cardiomentor bihotz-gutxiegitasuna lantzen ari da. Gaixotasun horrek prebalentzia handia du, eta lehenengo ospitaleratze-kausa da gure inguruko 65 urtetik gorakoen artean. Patologia horrekin loturik egoten dira askotan ospitaleratzeak, bai eta morbimortalitate handia ere jarraipenean; gainera, pronostikoa, neurri handi batean, diagnostiko goiztiar eta egoki baten mende dago —tratamendu optimizatua gorabehera—.
- “Cardiomentor-en helburua da bihotz-gutxiegitasuna duten pazienteen arretan parte hartzen duten espezialistek hobeto ezagutzea gaixotasuna. Etorkizunean, proiektuak beste agertoki kliniko batzuk har ditzake kontuan, hala nola fibrilazio aurikularra eta kardiopatia iskemikoa”, gaineratu du Pérez-Villacastín doktoreak. Eta horretan guztian funtsezko eginkizuna du SECek, gaixotasun kardiobaskularraren alorreko ezagutza eta esperientziari esker.
AA osasunean: informazio klinikoa modu errazean eskaintzen
Eraldaketa Digitalerako eta Funtzio Publikorako Ministerioko Adimen Artifizialeko Zuzendaritza Nagusiko Adimen Artifizialaren Gobernantzako eta Plangintzako zuzendari M.ª Jesús Martín Martínen ustez, Cardiomentor bezalako proiektuek oso ondo erakusten dute adimen artifizialak osasunean duen benetako balioa: informazio klinikoa askoz ere modu erraz eta intuitiboagoan eskaintzea, hizkuntza naturala erabiliz, eta, aldi berean, egunerokoan denbora kentzen duten zereginetan laguntzea, hala nola artikuluak laburtzen, oharrak egituratzen eta txostenen zirriborroak prestatzen.
- "Gaitasun horiek ez dute profesionala ordezten, baizik eta lagundu egiten diote eta benetan garrantzitsua denerako tartea libre uzten dute: pazientearekiko harremana eta erabaki klinikoak hartzeko", azpimarratu du.
- Osasuna den bezain sektore estrategiko eta datu sentikorrak dituen batean, "funtsezkoa da hizkuntza-ereduen azpiegitura publiko bat izatea, hala nola Alia ereduak, zeinak, informazioaren subiranotasuna, babesa eta kontrola bermatzeaz gain, gure kultura- eta hizkuntza-aniztasunera ere egokitzen baitira", azaldu du M.ª Jesús Martínek.
- Gainera, Eraldaketa Digitalerako eta Funtzio Publikorako Ministerioko Adimen Artifizialeko Zuzendaritza Nagusiko Adimen Artifizialaren Gobernantzako eta Plangintzako zuzendariak uste du proiektua “bereziki baliotsua” dela, oso profil desberdinak konektatzen dituelako, ikuspegi osagarriak dituztenak —besteak beste, klinikaren, ikerketaren eta teknikaren alorrekoak—. “Aniztasun horrek ikuspegia aberasten du, eta bermatzen du erabiliko dutenen benetako beharretan pentsatuz eraikiko dela teknologia”, zehaztu du.
Hain zuzen ere, TECNALIA eta Barcelona Supercomputing Center (BSC) dira Cardiomentor-en garatzaileak; proiektuak Osasun Laguntza Hobetzeko Institutuaren (IMAS) laguntza teknikoa ere izan du.
Profesionalentzako tresna fidagarria
Sergio Muñozek, TECNALIAko Osasun Digitaleko arduradunak, SEC25 Kongresuan nabarmendu du Cardiomentor jauzi kualitatiboa dela medikuntzan AA sortzailea aplikatzeko. “Gure helburua da CARDIOMENTOR tresna teknikoki sendoa izateaz gain baliagarria eta fidagarria izatea osasun-arloko profesionalentzat, eta haien eguneroko lanean laguntzea, informazio zorrotz, eguneratu eta testuinguruan kokatuaren bidez”.
TECNALIArentzat: “SECekin, IMAS Fundazioarekin eta BSCrekin lankidetzan aritzea funtsezkoa izan da Cardiomentor-ek benetako beharrei erantzungo diela bermatzeko. Zientziaren, teknologiaren eta klinikaren arteko sinergia horrek ahalbidetzen digu kardiologia zehatzagoa, prebentiboagoa eta pertsonalizatuagoa lortzeko bidean aurrera egitea”.
- “ALIA hizkuntza-ereduen familiaren azken urteetako garapena koordinatu dugu BSCn, Estatuko hizkuntza guztietan, eta, orain, gizartearen zuzeneko onura bilatzen duten aplikazioak garatzen hasi gara. Oso harro gaude Cardiomentor-en garapenaz —ALIA eredua erabiltzen duen lehenengo kasu praktikoetako bat da—. Aplikagarria izango da medikuentzako laguntzaile adimendun gisa eta prestakuntza-tresna gisa", adierazi du Andrés José Román Vieirosek.
- "Kasu honetan, bai eta BSCk garatutako beste batzuetan ere, AA sortzailea inplementatzean zuzeneko inpaktua sortu nahi da zenbait eremutan, hala nola osasungintzan eta zerbitzu publiko hobeak eskaintzeko helburua duten aplikazioetan”.
- Gainera: “IMAS Fundazioarentzat, osasun-laguntza hobetzeko helburuaren barnean, Cardiomentor proiektua funtsezko urratsa da, osasuna eraldatzeko bidean, bost helburu hauek betetzeko: Pazientearen eta profesionalaren esperientzia hobea, emaitza hobeak osasungintzan, efizientzia handiagoa eta ekitatea”, adierazi du Ignacio Ayerdi IMASeko Osasun Digitaleko koordinatzaileak.
- M.ª Jesús Martínen ustez, Cardiomentor-en moduko proiektuek erakusten dute “osasungintzako adimen artifiziala ez dela jada urrun ikusten den zerbait, baizik eta tresna praktiko bat, zeinak, etikoki eta subiranotasunez aplikatuta, ateak irekitzen baitizkio pazientea ikuspegi berri batetik tratatzeari”.
- Pérez-Villacastín doktoreak azpimarratu duenez, gainera, Cardiomentor-ek “ezagutza-iturri fidagarriak eta isuririk gabekoak erabiltzen ditu —beraz, egiazko informazio egiaztatua ematen du—, eta, garatzeko, kardiologo adituen laguntza du”.