"Sentsoreen teknologia berri bat garatzen ari gara hidrogenoaren erabileraren segurtasun-maila handitzeko"
Hidrogeno-ihesak detektatzeko zuntz optikoko sentsoreen bigarren eta hirugarren saiakuntza- eta baliozkotze-faseak abiarazi dira
Saiakuntzak Aragoiko Hidrogeno Fundazioak Huescan duen instalazioan egiten ari dira, helburu honekin: zuntz optikoko sentsore berriek hidrogeno-ihesak goiz eta zehaztasun handiz detektatzeko duten gaitasuna baliozkotzea. Zuntz optikoko sentsoreak Enagas partzuergo koordinatzaileak garatu ditu; besteak beste, Lumikerrek eta TECNALIAk parte hartzen dute, Opthycs proiektu europarraren esparruan.
- Zuntz optikoko sentsoreen konfigurazio desberdinen saiakuntzak egin dira, zenbait motatako ihes simulatu puntualak eta ihes-aldapa programatuak aplikatuta.
- Gas horrek gas naturalak eta beste energia-bektore batzuek baino leherkortasun handiagoa duenez, Opthycsen helburua da hidrogenoa banatzeko instalazioen segurtasun-maila handitzea (aireko eroanbidea, lurpekoa, konpresio-estazioak, etab.).
Segurtasunerako abangoardiako teknologia
Zuntz optikoko teknologian oinarritutako sentsoreak aurrerapauso gisa ikusten dira H2-aren ihesak detektatzeko egungo teknologiaren aldean. Sentsore horiek integrazio-ahalmen handia, energia-kontsumo txikia eta segurtasun- eta sentsibilitate-maila handiak dituztenez, hidrogeno-ihesak lehen etapetan identifika ditzakete, eta horrek gas hori erabiltzen duten azpiegituretan (ekoizpena, garraioa eta hornidura) segurtasuna areagotzea ekar dezake.
Hurrengo urratsak
Opthycs proiektuak proba- eta garapen-fase berriekin jarraituko du, sentsoreen errendimendua handitzeko eta hainbat industria-sektoretan haren erabilera zabaltzeko. TECNALIAk eta bere bazkideek elkarrekin lan egiten jarraituko dute teknologia berritzaile hori eskala handian ezartzeko prest dagoela ziurtatzeko.
