"Eskari termikoak murrizteko eta bateriak hozteko sistemak garatzeko estrategiak ebaluatzen ditugu"
TECNALIAk mugikortasun jasangarrirako osagai, ekipo eta sistema termikoak garatzea sustatzeko azpiegitura esperimental bat jarri du martxan.
TECNALIAk baldintza klimatikoak eta ibilgailuen eta beste mugikortasun-sistema batzuen profil termiko eta energetikoak zehazki erreproduzitzeko gai den azpiegitura berritzaile bat jarri du sistema termikoen laborategian.
Saiakuntzak egiteko espazio berri honek ibilgailuetako truke energetikoko teknologiak (hala nola, HVAC sistemak [HVAC], baterien kudeaketa termikoa [BTMS] edo kudeaketa termikoko soluzio integralak) testatzen eta baliozkotzen ditu, ibilgailu osoa eskura eduki beharrik gabe. Haren helburua da mugikortasun-sektorearen geroz eta eskakizun handiagoekin lerrokatuta dauden soluzio eraginkor eta jasangarriagoen garapena bizkortzea.
Erabilera-baldintza errealak birsortzeko aparteko azpiegitura
Azpiegitura tamaina handiko ganbera klimatiko batez osatuta dago. Ganbera hori bi ingurune termo-higrometriko desberdinetan bana daiteke. Hala, kanpoko eta barneko beharrezko baldintzak sortzen ditu aldi berean, ibilgailuen ekipo eta sistema termikoen karakterizazio termikoa egiteko eta haiek egiaztatu, baliozkotu eta garatzeko, hala badagokie. Baldintza hauek birsor ditzakeen ingurune erabat kontrolatu bat eskaintzen du:
- Kanpoko muturreko tenperatura- eta hezetasun-baldintza klimatikoak (40 °C-tik +50 °C-ra bitarte eta % 10etik % 90era arteko hezetasun erlatiboa).
- Ibilgailuko bidaiari-lekuko baldintza termo-higrometrikoak, bere karga eta disipazio termikoko profilekin.
- Bat-bateko aldaketa termiko-higrometrikoak.
- Hainbat garraiobideren benetako berezko funtzionamenduaren eskakizun termikoak, testatutako ekipoek behar dituzten aire, ur, ur glikolatu edo olio termikorako 60 kW termiko bitarteko truke-ahalmenak dituztenak.
Bereziki garrantzitsua da mugikortasunaren sektorerako
Ekipamendua sektore gakoek zeharka erabiltzeko bideratuta dago. Mugikortasunaren arloan, bereziki garrantzitsua da automobilgintzaren, trenbideen, ontzigintzaren eta hegazkintzaren esparruetan, eta hauek egitea ahalbidetzen dute:
- Eskari termikoa murrizteko (hotza eta beroa) estrategiak ebaluatu
- Ibilgailu-lekuaren klimatizazioa optimizatu
- Bateriak hozteko sistemak garatu eta baliozkotu, bai baldintza egonkorretan, baita zirkulazioko baldintza dinamikoetan ere. Baldintza horiek emulatzeko hardware-in-the-loop (HIL) teknologia erabiltzen da.
Ekipamendua hozgarri natural eta sukoiekin jarduteko instrumentazio- eta segurtasun-mailagatik nabarmentzen da. Sentsore aurreratuak eta erabat monitorizatuta eta erregistratuta dagoen kontrol termiko, elektriko eta hidraulikoko sare bat txertatzen ditu.
Azpiegitura berri horrekin, TECNALIAk aurrerapauso bat ematen du industriari teknologia garbi, eraginkor eta lehiakorretarako trantsizioa egiten laguntzeko, eta mugikortasun geroz eta jasangarriago bat sustatzen du.