Interakzio areagotua

Interakzio areagotua teknologia berriak benetan eta modu jasangarrian erabiltzeko katalizatzailea da; teknologia horien artean automatizazio aurreratua aipa dezakegu, eta, haren adibide gisa, giza itxurako robotika.

Tradizionalki, eztabaida-iturri izan da robotak industria-instalazioetan txertatzea. Izan ere, programazio konplexua eskatzen dute, prestakuntza espezializatuaren beharra dute eta komunikazio-hesi bat dago langilearen eta makinaren artean. 

Interakzio areagotuak puntu kritiko horiek konpontzen ditu. Errealitate areagotuaren, ahotsaren, keinuen eta halako interfaze intuitiboen bidez, langileen eta roboten arteko interakzioa naturala izan daiteke, programazio-lengoaia konplexuen beharrik gabe.  

Horrek automatizazio aurreratuaren hedapena azkartzeaz gain, gizakien eta makinen arteko benetako lankidetza sustatzen du, halako moldez non teknologia langilearen erritmora, hizkuntzara eta beharretara egokitzen baita.

Emaitza: industria malguagoa, seguruagoa eta lehiakorragoa, non robotika ezartzea ez baita erronka bat, giza lanaren bilakaera natural bat baizik. 

Teknologia hori ateak irekitzen ari da egituratu gabeko ingurune konplexuak izategatik eta gizakien esku-hartzearekiko mendekotasun handia izateagatik orain arte automatizatzen ezinezkoak ziruditen sektoreetan. Robotika aurreratuarekin eta kognitiboarekin konbinatutako interakzio areagotuari esker, automatizazioa ezartzeko oztopo nagusietako bat gainditzen ari da: erabiltzaileek egokitu behar izatea eta interfazeak ez aski intuitiboak izatea. 

Logistika industrialean, adibidez, robot mugikor autonomoek espazio dinamikoetan nabigatu eta kargak manipulatu ditzakete orain, errealitate areagotuko interfazeei esker; izan ere, interfaze horiek testuingurua ulertzeko eta denbora errealean erreakzionatzeko aukera ematen diete. Langile batek ikusmenaren bidez gida dezake robot bat, salgaiak berrantolatu edo eskariak hautatu ditzan, aldez aurretik programatu beharrik gabe. 

HORECA sektorean (ostalaritza, sukaldaritza eta cateringa), robot kolaboratiboek beren gain har ditzakete zeregin errepikakorrak, hala nola ontziratzea, materialak garraiatzea eta elikagaien oinarrizko prestaketa egitea, elkarrizketa bidezko interakzioan oinarritutako sistemei eta interfaze bisual intuitiboei esker; izan ere, interfaze horiei esker, langile ez-teknikoek errazago erabil ditzakete robotak. 

Eraikuntzan, berriz, droneek eta robot mugikorrek, keinuen bidez edo ikusmen areagotuaren bidez gidatuta, lagundu dezakete ikuskapenak egiten, materialak garraiatzen, osagaiak jartzen eta beste lan batzuetan. Horrek, segurtasuna hobetzeaz gain, lehen aurreikusten zailegiak edo garestiegiak ziren prozesuak automatizatzeko aukera ematen du.