Trantsizio energetikoaren egungo testuinguruan, sare elektrikoaren garapena planifikatu egin behar da, era horretan Euskadin azpiegitura elektriko bat eratzeko, bat etorriko dena enpresa-sarearen eta gizarte osoaren etorkizuneko beharrekin. Ekonomiaren etengabeko elektrifikazioa dela eta, beharrezkoa da sarearen ahalmena eta malgutasuna areagotzea, era horretan industria deskarbonizatzeko eta energia berriztagarriak hedatzeko.
Era berean, Euskadi 2030 Industria Plana egungo aukerei eta erronkei behar bezala erantzuteko sortu zen, eta 3 ardatzen inguruan egituratzen da: industria gehiago, industria hobea eta emisio gutxiago. Plan horretan, sare elektrikoaren garapenarekin lotutako 2 proiektu eraldatzaile identifikatu dira: Euskal sare elektrikoen plangintza eta Grid4Industry.
Grid4Industryren helburua da sare elektrikoetarako ekipamenduak fabrikatzen dituzten euskal enpresen jauzi teknologikoa lortzea, prest egon daitezen etorkizuneko sareek aurre egin beharko dieten erronkei begira, eta, horrela, gai izan daitezen datozen urteetarako aurreikusten den sare elektrikoetako inbertsio-ahalegina aprobetxatzeko.
Gainera, Grid4Industryk Euskadik aurrea hartzea ahalbidetuko du, lehendik dauden sare elektrikoak berritzeko eta haien ahalmena handitzeko garatzen den teknologia aprobetxatuz; horretarako, sarearen ahalmena eta malgutasuna areagotzea ahalbidetuko duten proiektu erakusleak abiaraziko dira.

Saioan Grid4Industry sakon ezagutzeko aukera izango da. Horrez gain, honako gai hauek eztabaidatuko dira:

• Zein diren garapen teknologiko nagusiak sareak diseinatzearen eta goi-tentsioko eta erdi-tentsioko lineen, airekoen eta lurpekoen ahalmena handitzearen arloan.
• Nolakoak diren azpiestazio adimendunen belaunaldi berriak, zeinak ahalmen handiko transformadorez eta maniobra-ekipamendu berriz hornituta baitaude.
• Nola funtzionatzen duten digitalizazio-, babes- eta kontrol-sistema aurreratuek.
• Zein diren sare elektrikoak garatzeko ildo horiei lotutako produktu eta ekipamendu teknologiko nagusiak.

Sare elektrikoa optimizatzeko, ekipamendu berritzaileak garatu behar dira, sarearen ahalmenaren kudeaketa areagotzeko eta hobetzeko aukera emango dutenak. Izapideak arinduko eta konexioak bizkortuko dituzten soluzio teknologikoak diseinatu behar dira; horri esker, ingurumen-inpaktu txikiagoarekin handituko dira sarearen segurtasuna eta erresilientzia.
Jardunaldiaren saio honetan zenbait gai tekniko landuko dira, hala nola:

• Zein diren banaketa-lineen diseinu berriak; besteak beste, euskarrien eta lurpeko kanalizazioen diseinu berriak.
• Nola laguntzen duten ahalmen handiko eroaleek lehendik dauden lineen ahalmena handitzen.
• Soluzio trinkoen diseinu berriek nola ahalbidetzen duten tramitazioak arintzea.
• Zein den potentzia-elektronikaren eta korronte zuzeneko banaketaren zeregina, sarearen ahalmena hobeki kontrolatzeko baliabide gisa.
• Nola laguntzen duten azpiestazio trinko digitalizatuen belaunaldi berriek eta haiei lotutako maniobra-ekipamenduek —zeinak urrunetik kudeatzeko gaitasunaz hornituak baitaude— hiri-inguruneetako aztarna murrizten eta konexio berriak arintzen.
• Nola hobetu daitekeen ekoizpen-instalazio berriztagarrien kontrola sare-tentsioaren eta -maiztasunaren gainean. Alderdi hori kritikoa da 2025eko apirilaren 28an penintsulako sistema elektrikoak jasan zuen itzalaldi elektrikoaren ondoren.

Saio horretan, sareen bilakaera markatzen ari diren teknologien ikuspegi teknikoa eskainiko da. Bilakaera horren testuingurua honako hauek osatzen dute: eskariaren elektrifikazioak, berriztagarrien integrazio masiboak eta jarduteko konplexutasun gero eta handiagoak.

Joera teknologiko nagusiak aztertuko dituzte etorkizuneko sare elektrikoaren erronkei aurrea hartu nahi dieten zerbitzu publikoetako enpresek, ekipamendu-fabrikatzaileek eta ingeniaritzek.

Saioaren helburua honako galdera hauei erantzutea izango da:

• IEC 61850ean, sentsorizazio aurreratuan, datu- eta komunikazio-protokoloetan eta arkitektura interoperagarrietan oinarritutako azpiestazio digitalek nola laguntzen duten jarduna malguagoa, automatizatuagoa eta erresilienteagoa izan dadin.
• Zein diren ikuspegi berriak babes eta kontrol moldagarrian, sarearen automatizazio aurreratuan eta datu-analitika eta OT/IT plataforma integratu bidezko denbora errealeko gainbegiratzean.
• Nola aplikatzen diren adimen artifiziala eta MLa, berriztagarrien presentzia handiko eta karga industrial kritikoko inguruneetan, diagnostiko prediktiborako, anomalien detekzio goiztiarrerako, sarearen egoeraren estimazio dinamikorako eta erabaki operatiboetarako.
• Zibersegurtasunak zer eginkizun duen —sarearen diseinuaren egiturazko elementu gisa—, eta zer joera dauden azpiegitura elektrikoen segmentazioan, etengabeko monitorizazioan, ahultasunen kudeaketan eta araudiaren betetzean.

Malgutasuna baliabide estrategiko bihurtu da sare elektrikoen, eta, ondorioz, sistema elektriko osoaren funtzionamendu egokirako. Halaber, funtsezkoa da industriaren deskarbonizazio lehiakor bateranzko bidean.

Honako hauek lehenengo mailako erronkak planteatzen dituzte: energia berriztagarrien gero eta presentzia handiagoa —emisioak murrizteko, energia merkatzeko eta autonomia energetikoa indartzeko ezinbestekoak baitira—, aurreikusten den eskari elektrikoaren hazkundea —industriaren elektrifikazioak bultzatua—, beste sektore batzuetan digitalizazioa, datu-zentroak eta teknologia elektrikoak txertatzea, eta hornidura segurua eta efizientea mantentzeko beharra.

Testuinguru horretan, industriarentzat eta EAEko, Espainiako eta Europako ekonomientzat elementu kritiko bihurtzen dira malgutasuna ematen duten baliabideak, hala nola biltegiratzea (edozein eskalatan), eskariaren erantzun aktiboa, eta sistemaren baldintzetara denbora errealean egokitzeko sorkuntza-gaitasuna eta sareak.

JIEEC 2026 jardunaldiaren saio honetan, biltegiratzearekin eta malgutasunarekin lotutako gaurkotasuna duten gaiak jorratuko dira, hala nola:

• Zer zeregin duen biltegiratzeak sistema elektriko berrian eta zer teknologia txerta daitezkeen epe labur eta ertainean penintsulako sistema elektrikoan.
• Nola errazten duen digitalizazioak sisteman malgutasun-zerbitzuak ematea.
• Nola eskain diezaioketen industriak eta datu-zentroek malgutasuna sistema elektrikoari, era horretan merkatuan eta sistema elektrikoan zeregin aktiboa izateak sortzen dituen aukerak kapitalizatzeko.
• Nola ari den garatzen malgutasunaren esparru arautzailea (malgutasun-merkatuak, energia-agregatzaileak, sareetarako sarbidea eta konexioak, biltegiratzearen erregulazioa, sorkuntza berriztagarrirako eta sareetarako baldintza teknikoak…).
• Zer negozio-ereduk erraztu dezaketen biltegiratze-teknologiak eta malgutasun-baliabideak txertatzea.

Bi zatitan banatutako saio horrekin amaituko da jardunaldia. Haren helburua da ekosistema ekintzailearen, industriaren eta eragile teknologikoen arteko harremana sustatzea, eta, horrela, lankidetza bultzatzea, bai eta berrikuntzaren transferentzia ere, merkatuko soluzio errealetarantz.

Saio horretan, zenbait startup hautatuk pitch formatuan aurkeztuko dute zer soluzio berritzaile ari diren proposatzen sektorearen egungo erronka teknologikoei erantzuteko.