Asfaltozko zoladura berri isilagoak, kautxu birziklatuzko pikortatua erabiltzeari esker
- Kautxu birziklatua duten zoladura berriek trafikoaren zarata 2 eta 5 dezibel artean murrizten dute.
- PERSEUS proiektuak asfalto-nahaste jasangarriagoak eta inpaktu akustiko txikiagokoak baliozkotu ditu errepidean
Madril, 2026ko urtarrilak 09 - PERSEUS proiektua joan den ekainean amaitu zen, eta errodadura-zarata nabarmen murrizten duten asfalto-nahaste berriak garatzea lortu du. Horretarako, kautxuzko pikortatua erantsi du; hain zuzen, pneumatikoen bizitza baliagarriaren amaieran (NFVU) birziklapenetik eratorritakoa.
- Material hori agregakinen ordezko partzial gisa erabiltzen da, eta, horri esker, soluzio jasangarriagoa lor daiteke, zoladuraren iraunkortasuna arriskuan jarri gabe.
- Proiektuaren partzuergoa —CAMPEZO, ASFALTIA, MOEVE, SIGNUS eta TECNALIA ikerketa eta garapen teknologikoko zentroak osatua— era koordinatuan aritu da lanean nahaste horiek garatzeko eta baliozkotzeko, bai laborategian, bai benetako proba eginez, AP-8ko "Metropoliaren hegoaldeko saihesbidea" zatian.
- Zati hori Bizkaiko Foru Aldundiak utzi zuen, Bizkaia Connected Corridor (BCC) ekimenaren bidez.
Erronka teknikoa: kautxu-partikula handiagoak eta proportzio handiagoan
Proiektuaren erronka nagusia izan da agregakinen zati bat normalean erabiltzen dena baino askoz tamaina handiagoko kautxu-partikulekin ordezkatzea, eta hori ugari egitea, zoladura poroelastikoak garatzeko.
- Horretarako, beharrezkoa izan da nahaste-formulazio berriak diseinatzea, aglutinatzaile espezifiko bat hautatzea eta multzoaren iraunkortasuna xehetasunez aztertzea, kautxuaren eta aglutinatzailearen arteko kohesioa bermatze aldera.
- Lan horri esker, errepideetan erabiltzeko egokiak diren bi motatako zoladura jasangarri eta fonomurriztaileak fabrikatu ahal izan dira, zeinak trafikoak sortutako zarata gutxitzeko gai baitira, bai eta, beraz, herritarren soinu-ingurunea hobetzeko ere.
Emaitza nagusiak
- Kautxu birziklatua eranstea: PERSEUS nahasteek 0,8 eta 8 mm arteko partikula-tamainako kautxu-pikortak dituzte. Agregakinaren ordezkapen-ehunekoa % 4 eta % 5 artekoa da; hau da, bost bat turismo-pneumatiko —balio-bizitzaren amaieran—, zoruan zabaltzen den nahastearen metro lineal bakoitzeko. Errepideetan erabili ohi den % 0,5 eta % 2 arteko proportzioa baino nabarmen handiagoa da kantitate hori.
- Tenperatura txikiagoa eta emisio gutxiago: tenperatura baxuko aglutinatzaile bat erabiltzeak ahalbidetu du 20 °C inguru murriztea fabrikatzeko eta obran jartzeko tenperatura, eta, horren ondorioz, nahaste-tona bakoitzeko 3 kg CO₂-emisioren baliokidea murrizten da.
- Zarata murriztea: nahaste berriek 2 eta 5 dB arteko hobekuntza akustikoa ematen dute. Europako CNOSSOS erreferentziaren arabera, bide batetik zirkulatzen duen trafikoa % 75 gutxitzearen parekoa da zarata 5 dB murriztea.