Zibersegurtasuna enpresetan

Azken urteotan, azaleratzen ari diren erronka teknologikoei aurrea hartu diegu, honako arlo hauek bultzatuz, besteak beste: ziberadimena, sistema txertatuen eta gailu konektatuen babesa, eta trazabilitate industrialari eta identitate digitalari aplikatutako Web3 teknologien garapena.

Gaur egun, esparru berritzaileak gidatzen ditugu, hala nola adimen artifizialaren, kriptografiaren eta komunikazio kuantikoen segurtasuna. Hori dela eta sortzen ditugun soluzioek eragin zuzena dute azpiegitura kritikoen, produktu industrial konektatuen eta sistema autonomoen babesean. Aurrea hartzeko eta teknologian lider izateko gaitasun horrek enpresei eta administrazioei aukera ematen die berrikuntza modu seguruan eta arau-eskakizunik aurreratuenen arabera txertatzeko. 

AAren zibersegurtasuna eraldaketa teknologikoaren eragilerik handienetako bat izango da datorren hamarkadan. Horretarako, funtsezkoa izango da kanpoko manipulazioen aurkako babesa bermatzea, bai egikaritzen diren ereduetan, bai entrenamendu-datuetan. AA seguru batekin bakarrik zabaldu ahal izango dugu haren erabilera funtsezko azpiegituretako prozesu kritikoetara. Portaera trazagarria izateak eta aldakuntza maltzurren aurkako babesak aukera emango dute erabilera-kasu berriak gaitzeko, gizarteak haiek onartzea sustatzeko eta sektore estrategikoetan duen eragina biderkatzeko. 

Horretarako, funtsezkoa izango da konputazio konfidentzialaren moduko teknologiak aplikatzea, zeinek, arriskutan sartu gabe, datu sentikorren gaineko AA ereduak entrenatzea ahalbidetuko baitute. Kriptografia aurreratuaren laguntzarekin, eragileen artean datuak partekatu ahal izango ditugu, eta, aldi berean, haien kontrola mantendu; horretarako, beharrezkoa izango da subiranotasun digitala errespetatuko duen autogestio seguru eta trazagarria gaitzea.

Aldi berean, kriptografia kuantikoaren eta komunikazio ultraseguruen bilakaerari esker, Internet kuantiko erresiliente eta seguru baterako lehen urratsak prestatuko dira.