Datu-espazio partekatuak industrian: unea ORAIN da
Datu-espazio partekatuak erakundeen edo gizabanakoen arteko lankidetza eta datu-trukea fidagarritasun osoz egin daitekeen guneak dira. Datuak silo eskuraezinetan gorde beharrean, datu-espazio partekatuek aukera ematen diete zenbait eragileri haiek dauden lekuetan daudela eskuratzeko.
Datu-espazio partekatuek zenbait onura dituzte:
- Kostuak murriztea: datuak biltzeko eta biltegiratzeko kostuak aurreztea, datuak toki bakar batean baitaude erabiltzen dituzten guztientzat.
- Efizientzia handiagoa: modu efizienteagoan lan egitea, ez baitituzte ahaleginak bikoiztu behar datuak biltzeko eta aztertzeko.
- Zehaztasun handiagoa: datuen zehaztasuna hobetzea, eragileek datuak elkarren artean osatzeko eta egiaztatzeko aukera baitute.
- Aukera berriak: lehen kontuan hartu ez ziren eragileen arteko lankidetzarako eta negoziorako aukera berriak, baita partekatzera bideratutakoak ere.
- Gardentasun handiagoa: gardentasuna eta kontu-ematea hobetzea, eragile bati baino gehiagori aukera ematen baitie datu berberak eskuratzeko eta haiek erabakiak hartzeko erabiltzeko.
Hala ere, badira datu-espazio partekatuekin lotutako erronka batzuk ere, hala nola datuen pribatutasuna eta segurtasuna, eta, ondorioz, konfiantza. Datu partekatuak modu arduratsuan babestu eta erabiltzen direla ziurtatu behar da, pribatutasunaren edo segurtasunaren aurkako edozein arrisku saihesteko.
Laburbilduz, datu-espazio partekatuek zenbait industria eta sektoretan berrikuntza eta lankidetza bultzatzeko ahalmena dute, betiere modu arduratsuan erabiltzen badira eta lotutako erronkei behar bezala heltzen bazaie.
TECNALIA eta datu-espazio partekatuak industrian
TECNALIAk badu behar beste gaitasun industriari, oro har, eta manufakturari, bereziki, haien eraldaketa digitala jasangarria izan dadin laguntzeko. Eta horrek barnean hartzen ditu datu-espazio partekatuei lotutako teknologiak.
Industria-sektorean zentratuta, datuak partekatzeko soluzio espezifiko eta integratuak jartzen ditugu industria-arloko enpresen eskura: premia teknikoak estaltzen dituzte datuen analisitik eta haien garbitasun eta egokitzapenetik hasi eta datuen pribatutasunarekin eta segurtasunarekin loturiko zenbait teknologiatara —hala nola zibersegurtasuna eta bloke-kateak—, datuen eta plataforma desberdinen arteko interoperabilitatea ere landuta.
TECNALIAn uste dugu unea dela gure potentziala ikuspegi integral batetik erakusteko (datuak+segurtasuna+pribatutasuna): estatuko beste ezein eragilek ez du halakorik.