"Teknologia hau sektore estrategikoetara zuzenduta dago, hala nola aeronautikara, automobilgintzara eta energia eolikora"
Beira- eta karbono-zuntz birziklatuen errebalorizazioa konposite birziklagarri berrietan
RESITESek zuntz lehorrezko mozketen berrerabilpena bultzatzen du, balio erantsi handiko aplikazioetan erabiltzeko
RESITES ekimen europarrak ekonomia zirkularrerako soluzio berritzaileen garapenean aurrera egiten du, konpositeak ekoizteko ebaketa-prozesuen ondoren baztertu ohi diren karbono- eta beira-zuntz lehorrezko ebakinak berrerabiltzen dituen teknologia bat baliatuz.
- Ekimenak hondakin industrial horiek errendimendu handiko material tekniko bihurtzen ditu, zeinak egokiak baitira egitura-osagai aurreratuak fabrikatzeko.
- Ikuspegi hori alternatiba eraginkorra da hondakinak murrizteko, industria-kostuak gutxitzeko eta material konposatuen ekoizpenean jasangarritasuna hobetzeko.
- Soluzioaren abantaila nagusietako bat da zuntzezko ehun-hondakinak ekoizpen-zikloan zuzenean berriz sartzeko aukera dagoela, zabortegira bidaltzea saihestuta.
- Prozesua industria-instalazioetan bertan erraz ezar dadin diseinatu da, hurbiltasuneko edo 0 Km-ko ereduari jarraituz, mozketa-hondakinak sortzen diren toki horretantxe trata daitezen ahalbidetzeko.
Beste hondakin konposatu batzuk ez bezala, zuntz lehorrezko ebakinak ez dira degradatzen
Hondakin konposatu horiek egitura-potentzial handia dute. Hori dela eta, lortutako materialak bateragarriak dira autoklaberik gabeko fabrikazio-prozesuekin (OOA), hala nola infusioarekin edo erretxina-transferentziaren bitartezko moldaketarekin (RTM), zeinak oso teknologia erabiliak baitira konpositeen industrian.
Soluzioa, gainera, bateragarria da erretxina birziklagarrien sistemekin, baita lotura itzulgarriko matrize termoplastiko eta termoegonkorrekin ere, eta, horrela, sendotu egiten da proiektuak industria-eredu zirkular eta jasangarriekin duen konpromisoa.
Sektore estrategikoak, hala nola aeronautika, automobilgintza eta energia eolikoa
Teknologia hau sektore estrategikoetara zuzenduta dago, hala nola aeronautikara, automobilgintzara eta energia eolikora, baita zuntz lehorrezko mozketa-hondakinak sortu eta balio erantsi handiko material bihurtu nahi dituen edozein industriatara ere.
Aurrerapen honen bidez, RESITESek erakusten du material konposatuen berrikuntza tresna giltzarri bilaka daitekeela Europako industria-jasanagrritasuna eta baliabide-efizientzia bultzatzeko.