«TECNALIAk robotika adimendunaren Europako ekosistema bultzatzen du»
TECNALIAk robotikari eta AAri buruzko Europako erakustaldi handian parte hartu du
Joan den irailaren 2an Europako Parlamentuan (Brusela) egin zen euROBIN erakustaldiak etorkizuneko industria definituko du
Joan den irailaren 2an, Europako Parlamentuak orain arte Europan egin den robotikako eta adimen artifizialeko erakustaldi handienetako bat hartu zuen. Horizon Europa programak finantzatutako euROBIN ekimenaren markoan, adimen artifizialean oinarritutako 15 robot erakutsi ziren, kontinenteko aurreratuenetakoak: gai dira ingurune konplexuetan moldatzeko, pertsonekin lankidetzan aritzeko eta duela urte gutxi arte makinentzat pentsaezinak ziren zereginak egiteko.
- Proiektuan parte hartzen duten erakundeen artean TECNALIA dago; Euskaditik, industria lehiakorrago, jasangarriago eta erresilienteago bat bultzatzera bideratutako robotika-teknologia aurreratuak garatzen laguntzen du.
- Jardunaldian, Europako Batzordeko ordezkariak, Europako Parlamentuko kideak, industria-enpresa liderrak eta robotikako nazioarteko adituak bildu ziren, robot adimendunek datorren hamarkadan Europako ekonomian izango duten zereginaz eztabaidatzeko.
- Parte-hartzaileen artean, Europako Batzordeko presidenteorde exekutibo Henna Virkkunen, Axel Voss europarlamentaria eta euROBIN sareko koordinatzaile zientifiko Alin Albu-Schäffer izan ziren.
Europako lasterketa teknologiko berria
Robotika-ikerketan duen posizio bikainari eusten dio Europak: aurrerapen aitzindariak egin ditu robot kolaboratiboetan, nabigazio autonomoan, manipulazio aurreratuan, sistema humanoideetan eta aireko robotikan. Sektorea inflexio-puntu batean dago, robotikaren eta adimen artifizialaren arteko konbergentzia merkatu global berri bat sortzen ari baita, automobilgintzaren edo telekomunikazioen industrien pareko potentzial ekonomikoa duena.
Hori dela eta, Europaren autonomia teknologikoa nola indartu eta berrikuntzaren industriarako transferentzia nola bizkortu aztertu zen Europako Parlamentuko topaketan. Eztabaidatutako proposamenen artean, adimen artifizialean oinarritutako robotikarako Europako ekimen espezifiko bat garatzea aipatu zen, adimen artifizialaren arloko EBren estrategia berriekin bat etorriko dena.
TECNALIAk robotika adimendunaren Europako ekosistema bultzatzen du
TECNALIAk modu aktiboan parte hartzen du euROBINen; robotikako bikaintasun-zentroen Europako sarea da, eta robot adimendunen garapena eta hedapena bizkortzeko ekosistema partekatu bat eraikitzen ari da Europan.
- Ekimenak Europako 14 herrialdetako 31 bazkide nagusi eta beste 38 erakundez osatutako sare zabaldu bat biltzen ditu, eta, arlo honetako lankidetzari dagokionez, Europako ahalegin handienetako bat bihurtu da.
- TECNALIAren ekarpena industria-aplikazio aurreratuetarako gaitasun robotiko berriak garatzean eta baliozkotzean oinarritzen da ; horri esker, ezagutza hainbat robot-sistemaren artean transferitzea sustatzen da, eta aurrerapen zientifikoak enpresetara azkarrago iristea errazten da.
- Era berean, Europako esperimentazio-azpiegitura partekatuen garapenean parte hartzen dugu. Azpiegitura horiek emaitzak alderatzeko, datuak eta ezagutzak trukatzeko eta berrikuntza bizkortzeko aukera ematen dute fabrikazio aurreratuan, automatizazio industrialean, ekonomia zirkularrean eta sistema autonomoetan, besteak beste.
Euskadi, fabrikazio aurreratuko eta robotikako erreferente
TECNALIA Europako topaketa honetan egoteak sendotu egiten du Euskadiren posizionamendua, kontinentean industria-berrikuntzaren arloko gune nagusietako bat den aldetik. Robotika kolaboratiboan, sistema autonomoetan, industria-digitalizazioan eta adimen artifizial aplikatuan duen esperientziari esker, TECNALIAk Europako erronka ekonomiko eta sozial handietako batzuei erantzuteko aukera emango duten teknologiak bultzatzen laguntzen du: produktibitatea handitzea, eskulan kualifikatuaren urritasuna, ekoizpen-eredu jasangarriagoetarako trantsizioa eta Europako industria-lehiakortasuna indartzea.
Ekitaldiak, gainera, agerian utzi zuen zentro teknologikoen, industriaren eta Europako erakundeen arteko lankidetza belaunaldi berriko roboten garapena eta ezarpena bizkortzen ari dela; robot horiek modu autonomoagoan, malguagoan eta seguruagoan lan egiteko gai dira fabriketan, logistika-zentroetan, ospitaleetan eta hainbat zerbitzu-ingurunetan.