"Gatz-haitzuloak aukera esperantzagarria dira hidrogeno-bolumen handiak metatzeko"
H2SALT ekimena aurrera egiten ari da gatz-haitzuloetan hidrogeno berdea masiboki metatu ahal izateko irtenbide teknologikoen sorreran
Gaur egungo ekonomia karbono gutxiko ekonomia bihurtzeko, soberakin berriztagarriak kudeatzeko eta industriari etengabeko hornidura bermatzeko gai diren azpiegiturak behar dira. Hala ere, hidrogenoak, energia-bektore gisa potentziala duen arren, oraindik ez du azpiegitura heldurik eskala handian metatzeko. Gabezia horrek mugatu egiten du ekoizpen berriztagarriaren eta industria-eskariaren arteko integrazio efizientea, eta erronka garrantzitsuak dakartza gasarekin kontaktuan dauden materialen segurtasunari, osotasunari eta iraunkortasunari dagokienez.
Gatz-haitzuloak hidrogeno-bolumen handiak modu seguruan eta kostu efizientearekin metatzeko aukera esperantzagarrienetako bat dira.
- Haitzulo horiek garatzeko, hobeto ulertu behar da gasak formazio geologiko horietan duen portaera, hobetu egin behar da barrunbeen diseinua eta aurrera egin behar da hidrogenora berariaz egokitutako materialetan, sistema tubularretan eta instalazio osagarrietan.
- Hidrogenoak altzairu eta aleazio jakin batzuetan, zenbait fenomeno kaltegarri eragin ditzake, hala nola hauskortasuna, iragazkortasuna edo degradazio azkartua,. Horregatik, ezinbestekoa da denbora luzez presio-, ziklotze- eta esposizio-baldintzetan hidrogenoaren propietate mekanikoak eta egitura-osotasuna mantentzeko gai diren soluzio materialak garatzea eta baliozkotzea.
H2SALT proiektua
H2SALT proiektuaren helburua da Europan oraindik ere nabariak diren teknologia- eta ezagutza-muga horiek gainditzea, hidrogenoa lurpean metatzeko prozesuaren garapena bizkortzeko aukera emango duten irtenbide zientifiko eta industrialak sortuz. TECNALIAk hidrogenoaren portaeran eta materialen bateragarritasunean eta karakterizazioan duen esperientzia ematen du, funtsezko elementuak baitira azpiegitura horien segurtasuna eta osotasuna bermatzeko.
- Partzuergoak modu koordinatuan lan egiten du hidrogenoa lurpean metatzeko eskakizunetara egokitutako soluzioak garatzeko, barne dela sistema tubularren, osagai kritikoen, instalazio osagarrien eta eragiketa seguruko estrategien diseinua.
- Proiektuan Iberiar penintsulako zenbait gatz-formazioren karakterizazioa jasotzen da, bai eta haitzuloen diseinu kontzeptuala eta haiek erabiltzeko behar diren injekzio- eta erauzketa-sistemena ere, hasierako faseetatik integratuz hautaketa-irizpide aurreratuak, baliozkotzea eta materialek hidrogenoaren aurrean duten portaera.
- Aurrerapen horiek urrats erabakigarria dira etorkizunean sistemari egonkortasuna emango dioten eta Euskadi hidrogenoarekin lotutako teknologien eta azpiegitura kritikoetarako material aurreratuen garapenaren Europako erreferente gisa kokatuko duten lurpeko biltegiak ezartzeko.
Partaidetzapeko enpresak
H2SALT proiektua batera finantzatzen dute Berreskuratze, Eraldaketa eta Erresilientzia Planak eta Europar Batasuna–NextGenerationEUk, eta partzuergo bat du, TEAM Ingeniería y Consultoría enpresak koordinatua. TUBACEX, Tubos Reunidos, Tamoin, Iberdrola, Basque Energy Cluster eta Siderex enpresek ere parte hartzen dute, besteak beste, IGME–CSIC eta TECNALIArekin lankidetzan.