"SMART BAYS proiektuak zamalanetako hiriguneak digitalizatzen eta optimizatzen ditu, hiri-logistikaren efizientzia hobetzeko"
Kudeaketa adimendunaren belaunaldi berria zamalanetako hiriguneetarako, SMART BAYS proiektuaren bidez
Salgaien hiri-banaketa hirien mugikortasunerako erronka handienetako bat bihurtu da. Kate logistikoaren azken tarte hori funtsezkoa da saltokiak, ostalaritza, osasun-zentroak eta etxeak hornitzeko, eta aurrekaririk gabeko hazkundea izaten ari da, merkataritza elektronikoaren gorakadari eta entrega azkar, malgu eta oso trazagarrien eskariak gora egin dutelako. Hala ere, funtsezko jarduera hori gero eta pilatuagoa dagoen eta gero eta murrizketa handiagoak dituen hiri-testuinguru batean garatzen da,, non ez baitago zamalanetarako lekurik, eta efizientzia hobetzeko eta ingurumen-inpaktua murrizteko beharra premiazkoa da.
Egoera horretan, zamalanetarako eremuen digitalizazioa eta kudeaketa adimenduna elementu erabakigarri bihurtu dira hiri-logistika antolatuagoa, jasangarriagoa eta efizienteagoa bermatzeko. Hor kokatzen da, hain zuzen ere, SMART BAYS.
Hiri-espazioa efizienteagoa izateko eraldaketa digitala
TECNALIAk parte hartzen du SMART BAYS proiektuan. Proiektu estrategiko horren helburua da zamalanetako hiriguneen kudeaketa teknologia digital aurreratuen bidez eraldatzea. Ekimenak eredu berritzaile bat proposatzen du, gai dena eremu horiek modu dinamikoan eta denbora errealean monitorizatzeko, esleitzeko eta kudeatzeko, eta, hala, hiri-logistika efizienteagoa, jasangarriagoa eta konektatuagoa izaten lagunduko du.
Soluzio adimendun bat gero eta handiagoa den hiri-erronkari aurre egiteko
Merkataritza elektronikoaren hazkundeak eta espazio publikoaren gaineko presioak salgaiak hirian banatzeko eragiketak optimizatzeko beharra areagotu dute.
- SMART BAYS proiektuak hainbat teknologia integratuz heltzen dio erronka horri, hala nola adimen artifiziala, big data, IoT edo gauzen Internet eta biki digitalak, efizientzia operatiboa hobetzeko, emisioak murrizteko eta hiri-espazioa modu arrazionalagoan erabiltzeko.
- Soluzio horrek aukera emango du zamalanetarako eremuak modu egokituan dimentsionatzeko, biki digital baten bidez hiri-agertokiak simulatzeko eta eskaera logistikoari denbora errealean erantzungo dioten eremu dinamikoak hedatzeko.
Espainiako hirietan baliozkotzea
Eredua Espainiako hainbat hiritako datu errealen bidez ebaluatuko da, barne direla Zaragoza, Sevilla, Gasteiz eta Donostia, ereduaren erreplikagarritasuna bermatzeko eta hainbat hiri-errealitatetarako soluzio eskalagarri bat finkatzeko.
Partzuergo publiko-pribatu sendo bat
SMART BAYS proiektua ekosistema logistiko eta teknologikoko funtsezko eragileek osatzen duten estatuko partzuergo batek bultzatzen du. Parte hartzen duten entitateen artean daude, TECNALIAz gainera, ALIA, CITET, MLC‑ITS Euskadi, TECNARA, Smart City Cluster, UNIZAR, EBOCA, ROUTAL, Novapan, EFOR, Novaltia, Nemi, Callizo eta BonÀrea erakundeak, besteak beste.
TECNALIAren ekarpena
TECNALIAk mugikortasunari aplikatutako teknologia digitaletan, modelizazio aurreratuan eta sistema adimendunetan duen esperientzia jartzen du besteen zerbitzura, eta eredu birtualak diseinatzen eta baliozkotzen parte hartzen du. Horri esker, zamalanetarako eremuen kudeaketa optimizatu eta hiri-kudeaketako estrategia berrien inpaktua ebaluatu ahal izango da.
Hiri adimentsuago eta jasangarriagoen aldeko apustua
SMART BAYS proiektua klimaren aldetik neutroak diren hirietara bideratutako Europako estrategien barruan kokatzen da, eta hiri-mugikortasun arinagoa, efizienteagoa eta ingurunea gehiago zaintzen duena lortzeko soluzio teknologikoak sustatzen laguntzen du.
Proiektua Industria eta Turismo Ministerioaren enpresa-elkarte berritzaileentzako laguntzen esparruan dago finantzatuta.