“2050erako karbono-neutraltasuna lehentasunezko helburua da Europan”
Sestaoko Udalak TECNALIA jarri du buru Next-Land berrikuntza- eta lehiakortasun-poloa sortzeko gakoak zehazteko prozesuan.
Ekimen hori Bizkaiko Foru Aldundiaren Bizkaia Orekan Sakonduz programakoa da, eta Sestao Berriek sustatzen du. Haren helburua da Sestao erreferentzia bihurtzea deskarbonizazioan eta trantsizio energetikoan oinarritutako industria berrian.
2050erako karbono-neutraltasuna lehentasunezko helburua da Europan, eta teknologia eta berrikuntza funtsezkoak izango dira enpresen lehiakortasuna bermatzeko. Testuinguru global horretan kokatzen da lan hau.
Sestaok industria-tradizio handia du, baita Euskadin erreferentzia diren enpresak ere (adibidez, ArcelorMittal, Euskal Forging eta Gescrap); hala, aukera du aldaketa horren buru izateko, eta ekoizpen-sarea sendotzen duten prozesuei lagundu eta tokiko kalitateko enplegua sustatzeko.
Estrategia partekatu bat, baterako sorkuntza-prozesu bati esker
TECNALIAk garatutako laguntza teknikoan hau sartzen da:
- Berrikuntza-polo eta -klusterretan erreferentzia-ereduak eta arrakastarako funtsezko faktoreak identifikatzea.
- Energia-trantsizioan dauden enpresen heldutasun- edo aurrerapen-maila aztertzea.
- Epe ertain eta luzeko ikuspegia definitzea hiri- eta industria-ikuspegitik deskarbonizaziora bideratua dagoen Berrikuntzako eta Lehiakortasuneko Polo (PIC-NextLand) baten diseinuaren eredu kontzeptualerako.
Horretarako, elkarrizketak eta talde-dinamikak egin dira La Navaleko lantegi zaharraren industrialdeko ekosistemako funtsezko eragileekin. Saio horietan, estrategia partekatu bat bermatzeko proposamenak aztertu dira.
Prozesu horren guztiaren helburua da PIC-NextLand sortzeko oinarriak bilduko dituen dokumentu bat osatzea, udalerriko 2030 Agendarekin bat datorrena eta hiri-ekonomia dinamizatzeko helburua duena.
Prestakuntzan eta berrikuntzan erreferentzia den gunea
Bizkaiko Labe Garaietako Ikastunen Eskolaren eraikin historikoaren birgaitzea, martxan dagoena, prestakuntza eta berrikuntzaren erreferentziazko gune bihurtuko da, Sestaoko Behargintzaren bidez enplegua sustatzeko eta etorkizuneko poloaren hazi gisa.
- Bere historia berreskuratzearekin batera, prestakuntza dualeko planak, langabetuentzako birgaitze-planak eta ibilbide inklusiboak lehenetsiko dira han.
- Halaber, “living lab” gisa ere izango du zeregin garrantzitsua; han, Sestaoko industria-nortasuna birsortzeko bidean aurrera egingo dute ikasleek, enpresek eta teknologia- eta prestakuntza-zentroek.
- Ekimen horren bidez, TECNALIAk berretsi egiten du industriaren eraldaketarekin eta lurralde-garapenarekin duen konpromisoa, eta Sestaok etorkizuneko industria jasangarriaren eragile ekonomiko gisa duen zeregina indartzen laguntzen du.