“Modu anitzeko estazio bat eraiki da, katean lan egiten duen bero-ponpa bat, hozkailu bat eta biomasa-galdara dituena eta geotermia erabiltzen duena”.
TERA_RED ekimenaren helburua da aztertzea zer bideragarritasun duten teknologia batzuek tenperatura baxuko eta oso baxuko sareetan erabiltzeko, gakoa baita hori eredu energetiko jasangarriak lortzeko.
Energia-sistema eraginkorragoak eta deskarbonizatuak lortzeko aurrerapausoak ematen jarraitzen dute Espainian, TERA_REDen moduko proiektuekin. Garapen Teknologiko Industrialerako Zentroaren (CDTI) laguntza du ekimen horrek, eta Veoliak koordinatzen du.
Proiektuak bost enpresa eta hiru zentro teknologiko bildu ditu, ingurune erreal eta birtual batean, tenperatura baxuko eta oso baxuko sareetan erabil daitezkeen eta energia-eredu jasangarrietara eboluzionatzeko estrategikoak diren zenbait teknologiaren bideragarritasuna aztertzeko.
- Sare horiei anergetiko edo neutro ere deitzen zaie, eta ura 50 °C-an baino gutxiagoan erabiltzea bultzatzen dute, galera termikoak minimizatzeko eta energia berriztagarriak integratzen laguntzeko.
- Teknologia horien potentziala baliozkotzeko, TERA_REDek modu anitzeko estazio bat eraiki du CEDER-Ciemateko instalazioetan (Soria). Instalazio horrek katean lan egiten duen bero-ponpa bat, hozkailu bat eta biomasa-galdara bat ditu, eta geotermia erabiltzen du.
- Estazio hori zentroko eraikinetako batera konektatu da, teknologia bakoitzak ingurune operatibo erreal batean duen portaera baliozkotzeko, eta ebidentzia sendoak eman ditu efizientziari buruz eta etorkizuneko hiriko eta industriako sare termikoetarako aplikagarritasunari buruz.
Biki digitalak eta kontrol adimenduna
TECNALIAk biki digital aurreratuak garatu ditu hozkailurako, zeina modu anitzeko estazioaren pieza nagusietako bat baita.
- Biki digital horiek denbora errealean erreproduzitzen dute ekipamenduaren portaera dinamikoa, eta aukera ematen dute operazio-egoerak simulatzeko, errendimendua optimizatzeko eta gorabehera posibleei aurrea hartzeko.
- Garapen hori kontrol adimenduneko algoritmoekin osatu da, anomaliak identifikatzea ahalbidetzen duten hutsegiteak modu prediktiboan detektatzeko, sistemaren errendimenduan edo eskuragarritasunean eragin dezaten baino lehen.
Bultzada estrategikoa industriarako eta trantsizio energetikorako
TERA_REDen arrakastak erakusten du bideragarria dela teknologia berriztagarriak eta azken belaunaldiko ekipamenduak tenperatura baxuko sare termikoetan teknikoki integratzea. Sare horiek deskarbonizazioa bizkortzeko funtsezkoak izan daitezkeela ematen du, batez ere oraindik erregai fosilak nagusi diren sektoreetan.
Enpresa hauek parte hartu dute ekimenean: Veolia (koordinatzailea), Geoter, Intarcon, Keyter eta Curvados Quintín. Ciemat, Cartif eta TECNALIA zentro teknologikoek ere parte hartu dute.
Honelako ekarpenekin, soluzio teknologikoen diseinuarekin dugun konpromisoa sendotzen dugu, enpresek eta administrazioek energia-sistema malguago, eraginkorrago eta jasangarriagoetarantz aurrera egin dezaten, eta, horrela, karbonorik gabeko eredu baterako trantsizioan duten lidergoa sendotu dezaten.