CO₂-aren atzipena eta balorizazio material eta energetikoa

Berrikuntzarik handiena da material eta prozesu integratu berriak garatzea, CO₂-a atzitzeko eta balorizatzeko, erregai sintetiko, konposatu kimiko eta material jasangarri bihurtuz.

Ikuspegi horren lehenengo oinarria teknologia aurreratuak dira, hala nola CO₂-a modu selektiboan atzitzeko material funtzionalak diseinatzea eta testatzea, eta, bigarrena, hura eraldatzeko prozesua areagotzea zenbait prozesuren bidez (katalisi heterogeneoa, erreaktore berritzaileen garapena eta elektrolisi bidezko bihurketa elektrokimikoa) eta, hala, efizientzia eta bideragarritasun industriala optimizatzea.

Horri esker, enpresek ingurumen-aztarna murrizteko aukera sortzen da, bai eta emisioen balorizazioan oinarritutako negozio-eredu berriak sortzekoa ere, eta, aldi berean, industria-lehiakortasuna indartzen da eta klima-helburu globaletarantz aurreratzen da. 

Helburu klimatikoak lortzen laguntzen duen edozer positiboa izango da gizarte osoarentzat.

Datozen 10 urteetan, bi alderdi hauek uztartzen dituzten erabilerak nabarmenduko dira: CO₂-a zuzenean atzitzea eta hura erregai jasangarri, lehengai kimiko eta karbono-aztarna negatiboko eraikuntza-material bihurtzea.

Atzitutako CO₂-a era seguruan garraiatzea eta biltegiratzea ere ardatz estrategikoa izango da; horretarako, azpiegitura espezifikoak eta material aurreratuak beharko dira, CO₂-aren egonkortasuna eta trazabilitatea bermatze aldera. Era berean, giltzarri izango dira industriarako (kimika, zementua, altzairua) soluzioak, bai eta bioekonomian eta nekazaritzan CO₂-a balorizatzea ere.

Horren guztiaren ondorioz, material eta teknologia berriak garatu beharko dira, eta zorrotz probatu, haien efizientzia, jasangarritasuna eta eskalagarritasuna bermatzeko. Berrikuntza horiek funtsezkoak izango dira neutraltasun klimatikoa lortzeko eta Europan industria erresiliente, jasangarri eta lehiakor bat eraikitzeko.