TECNALIAk edukiera handiko drone elektriko bat diseinatu du baso-suteak itzaltzeko
- Ikerketa aplikatuko eta garapen teknologikoko zentroa parte hartzen ari da CLUE Technologies enpresak gidatutako eta CDTIk finantzatutako proiektu honetan, Aeromedia, Bastan, Drone Hopper, Helion eta Telespazio enpresekin batera, CATEC eta ITG zentroen laguntza teknologikoarekin
- Ekimenak aurrerapen teknologiko garrantzitsua dakar egungo droneen aldean; izan ere, edukiera handiko (600 kg-rainoko) drone tripulatugabeetan oinarritutako suebaki- eta itzaltze-sistema bat du
- TECNALIAk karga-gaitasun handiko aireontzi tripulatugabe bat diseinatu eta balioztatu du: haren hegaldiaren kontrola, laguntza-sistemak eta prototipo funtzional bat garatu ditu, eta azken hori benetako suarekin probatu du bere laborategian
Donostia, 2026ko uztailaren 16a. TECNALIA ikerketa aplikatuko eta garapen teknologikoko zentroak edukiera handiko drone elektriko bat diseinatu du baso-suteak itzaltzeko. Horretarako, urez kargatzen da eta deskarga horizontal zein bertikal handiak egiten ditu. EXTINCIA izena du TECNALIA parte hartzen ari den proiektuak (UAV —aireontzi tripulatu gabeak— eta Adimen Artifizial bidezko Landa Suteak Itzaltzeko Sistema Aurreratua), eta helburua da suteak itzaltzeko zehaztasuna eta eraginkortasuna hobetzea. Horretarako, 600 kg-rainoko deskarga bertikal zein horizontalak egiteko gai diren ibilgailu tripulatugabeak erabiltzen dira, bereziki erabilgarriak direnak biztanle-guneetatik edo azpiegitura kritikoetatik gertu dauden foku txikietan esku hartzeko.
TECNALIAren zeregina alderdi hauetan ardaztu da: suteak itzaltzeko karga eta deskarga horizontal eta bertikal handiko aireontzi tripulatugabe baten diseinua; itzaltze-lanetarako hegaldiaren kontrolaren garapena, perturbazioei uko egiteko teknikak eta aire-nabigaziorako laguntza —LIDAR— barne; aireontziaren eskalako prototipo baten garapena, itzaltze-kanoi bat eta sistemak integratzen dituena; eta laborategian benetako suarekin egindako balioztatze-hegaldiak.
TECNALIA parte hartzen ari den ekimena CDTIk finantzatzen du eta CLUE Technologies enpresak gidatzen du. Azken enpresa horrek adimen artifizialaren bidez landa-eremuetako eta hiri-periferietako baso-suteei aurre egiteko teknologia garatzen du, Aeromedia, Bastan, Drone Hopper, Helion eta Telespazio enpresekin batera, eta CATEC eta ITG zentroen laguntza teknologikoarekin.
Berrikuntzaren ardatzak
Suteak itzaltzeko aire-plataforma berria hiru ardatzetan oinarritzen da: karga-gaitasun handia duten eta suteak itzaltzeko berariaz diseinatutako drone elektrikoen erabilera; adimen artifizialaren eta ontziratutako konputazioaren integrazio aurreratua, denbora errealean eta zehaztasunez jarduteko; eta aireontzi tripulatuen eta tripulatugabeen arteko elkarbizitza segurua ahalbidetzen duten sistemen garapena (sute-operazioetan orain arte konpondu gabeko funtsezko alderdia). Hori guztia operazio-eraginkortasuna, denbora errealeko erabaki-hartzea eta natura-ingurunearen zein itzaltze-lanetan parte hartzen duten pertsonen babesa hobetzera bideratuta dago.
- Ekimen honek aurrerapen teknologiko handia dakar egungo droneen aldean, aireontzi tripulatu gabeetan oinarritutako suebaki- eta itzaltze-sistema bat baitu. Drone horiek adimen artifizialarekin eta aire-kontrolerako sistema aurreratuekin konbinatuz gero, hasierako fokuetan azkar eta zehatz esku har daiteke, hala sua zabaltzeko arriskua murriztu eta operazioen segurtasuna hobetzeko.
- EXTINCIA proiektuak aireontzi tripulatuen eta tripulatugabeen arteko elkarbizitza segurua ere sustatzen du, aire-trafikoa kudeatzeko sistema aurreratu baten bidez. Horrez gain, lurreko langileak komunikatzeko eta monitorizatzeko sistemak integratzen ditu, eta, ondorioz, brigaden segurtasuna hobetzen du: arrisku handiko eremuekiko esposizioa murrizten du eta denbora errealean datuak ematen ditu erabakiak hartzeko.
TECNALIAri buruz
TECNALIA Espainiako ikerketa aplikatuko eta garapen teknologikoko zentro handiena da, Europako erreferentzia eta Basque Research and Technology Alliance-ko kide. Enpresa eta erakundeekin elkarlanean aritzen da, lehiakortasuna eta pertsonen bizi-kalitatea hobetzeko eta hazkunde jasangarria lortzeko. Horretarako, 1.500 lagunetik gorako lantalde bat dauka, ikerketa teknologikoaren eta berrikuntzaren bidez mundu hobea eraikitzeko konpromisoa hartu duena. Hauek ditu jarduera-eremu nagusiak: fabrikazio adimenduna, eraldaketa digitala, trantsizio energetikoa, mugikortasun jasangarria, osasuna eta elikadura, hiri-ekosistema eta ekonomia zirkularra.
TECNALIAren misioa da ikerketa teknologikoa oparotasun bihurtzea, eta ikuspegia, berriz, enpresen eta gizartearen eraldaketaren eragile lider gisa etorkizunari aurrea hartzea, gero eta azkarrago eboluzionatzen ari den munduaren erronketara egokitu daitezen. Horregatik, TECNALIAren ikerketak benetako eragina du gizartean, eta onurak sortzen ditu bizi-kalitatean eta aurrerabidean. European Research Survey ERSk ospeari eta posizionamenduari buruz egindako azken azterketan (2025ean egina da), TECNALIA lehen postuan ageri da I+G+Ban markak duen ospeari dagokionez.