Kardiologian eta medikuntzan AA sortzailea bultzatzen dugu

TECNALIAk, Espainiako Kardiologia Elkarteak eta Osasun Laguntza Hobetzeko Institutua Fundazioak AA sortzailea bultzatzen dute kardiologiarako eta medikuntzarako

Derio (Bizkaia), 2025eko urriaren 7a. TECNALIA ikerketa eta garapen teknologikoko zentroak, Espainiako Kardiologia Elkarteak (SEC) eta Osasun Laguntza Hobetzeko Institutua Fundazioak (IMAS) lankidetzako esparru-hitzarmen bat sinatu dute, adimen artifizial sortzailea kardiologian eta medikuntzan erabiltzea bultzatzeko.

Akordioaren helburua da kardiologia eta medikuntza indartzea adimen artifizial sortzailearen, datu-ekosistemen eta eredu aurreratuen bidez —hala nola bihotzaren biki digitalak—. Horrela, ekosistema digital bat sortzen lagunduko da, osasun-sektorean berrikuntza eta emaitzen transferentzia errazteko. Hitzarmenaren helburu nagusia da osasun kardiobaskularrean berrikuntza sustatzea, honako hauek txertatuz: abangoardiako teknologiak, ikerketa klinikoa eta prestakuntza espezializatua.

Eredu prediktiboak

Lankidetza horren abiapuntua da osasun-datuen erabilera sekundarioa bultzatzea, ezagutzaren motor gisa eta ikerketa bizkortzeko palanka gisa. Hori oinarri hartuta, akordioaren helburua da adimen artifizialeko azken aurrerapenak kardiologikoaren eremura transferitzea, eredu prediktiboak eta tresna automatizatuak erabiliz osasun-arloko profesionalen lana errazteko, laguntza-zerbitzuen efizientzia handitzeko eta etengabeko gaikuntzako eredu berriei atea irekitzeko.

Datuen eta adimen artifizialaren arteko konbergentzia horren ondorioz, lankidetzaren hirugarren zutabea da aurrerapenak egitea biki digital multimodalen gaineko ikerketan, garapenean eta berrikuntzan. Biki digital multimodalak eredu birtualak dira, informazio klinikoa, genomikoa, irudiei lotua eta bizimoduari lotua integratzen dutenak, egoera terapeutikoak simulatzeko eta erantzun indibidualetan aurrea hartzeko. Teknologia hori urrats erabakigarria da medikuntza pertsonalizaturantz; izan ere, erabaki klinikoak paziente bakoitzaren ezaugarri berezietara egokitzeko aukera ematen du.

Aliantza horrekin, TECNALIAk, IMASek eta SECek bikaintasun zientifikoarekin, berrikuntza teknologikoarekin eta arreta kardiobaskularraren etengabeko hobekuntzarekin duten konpromisoa indartzen dute, eta erreferentzia gisa kokatzen dira osasun-sistemaren eraldaketa digitalean.

• Javier González Lodosok, TECNALIAko Osasun Merkatuko zuzendariak, lankidetza horren berezitasuna adierazi du: “Gaur egun martxan dagoen berrikuntza da I+Garen arrakastaren oinarria, eta, beraz, bazkide teknologikoak, aditu klinikoak eta osasun sistemetako adituak elkartzeak bermatzen dute osasunari aplikatutako adimen artifizialean lan egiteko aliantza berezi horretatik sortuko diren proiektuen etorkizuneko arrakasta”.
• Bestalde, Luis Rodríguez Padial Espainiako Kardiologia Elkarteko presidenteak ekimenaren garrantzia nabarmendu du: “Esparru-hitzarmen hau sinatzea urrats erabakigarria da adimen artifizial sortzailea erabiliz kardiologia, eta, oro har, medikuntza eraldatzeko. Lankidetza horri esker, aurrera egin ahal izango dugu kardiologiako arreta medikoaren diagnostikoan, tratamenduan eta pertsonalizazioan ”.
•  “Adimen artifiziala kardiologian aplikatzearen helburua ez da soilik diagnostikoa eta tratamendua hobetzea; teknologiaren eta pazientearen osasunaren arteko harremana eraldatzea ere badu helburu. Konpromiso bat da, berrikuntzak balio dezan medikuntza zehatzagoa, pertsonalizatuagoa eta efizienteagoa lortzeko”, adierazi du Ignacio Ayerdi IMAS Fundazioko Osasun Digitaleko koordinatzaileak. “Lankidetza hori funtsezkoa da pertsonak gehiago eta hobeto bizi daitezen, gaixotasun kardiobaskularrei tresna adimendun eta humanoen bidez aurre eginez”.

Osasun Laguntza Hobetzeko Institutua Fundazioari (IMAS) buruz

Osasun Laguntza Hobetzeko Institutua 2014an sortu zen. Prestakuntzaren, ikerketaren, kalitate-programen, osasun digitalaren eta osasun-politikaren bidez, osasun-zentroetan eta -zerbitzuetan ematen diren zerbitzuen kalitatea hobetzen laguntzen du, eta osasun-laguntzan parte hartzen duten eragileen lankidetza eta parte-hartzea sustatzen dugu.

TECNALIAri buruz

TECNALIA Espainiako ikerketa aplikatuko eta garapen teknologikoko zentro handiena da, Europako erreferentzia eta Basque Research and Technology Alliance-ko kide. Enpresa eta erakundeekin elkarlanean aritzen da, lehiakortasuna eta pertsonen bizi-kalitatea hobetzeko eta hazkunde jasangarria lortzeko. Horretarako, 1.500 lagunetik gorako lantalde bat dauka, ikerketa teknologikoaren eta berrikuntzaren bidez mundu hobea eraikitzeko konpromisoa hartu duena. Hauek ditu jarduera-eremu nagusiak: fabrikazio adimenduna, eraldaketa digitala, trantsizio energetikoa, mugikortasun jasangarria, osasuna eta elikadura, hiri-ekosistema eta ekonomia zirkularra.

TECNALIAren misioa da ikerketa teknologikoa oparotasun bihurtzea, eta ikuspegia, berriz, enpresen eta gizartearen eraldaketaren eragile lider gisa etorkizunari aurrea hartzea, gero eta azkarrago eboluzionatzen ari den munduaren erronketara egokitu daitezen.

European Research Survey ERSk ospeari eta posizionamenduari buruz egindako azken azterketan (2022an egina da), TECNALIA lehen postuan ageri da I+G+Ban markak duen ospeari dagokionez.