Sare elektrikoen digitalizazioa eta hibridazioa

Azpiegiturak hobetzen eta neutraltasun-konpromisora hurbiltzen lagunduko duen balio-proposamen orok enpresari ez ezik, gizarte osoari ekarriko dio onura. Besteak beste, berrikuntza hauek nabarmentzen ditugu:

• BATTWIN, bateria elektrikoen biki digitala: bateriaren zahartzea ebaluatzeko aukera ematen du; hartara, bateriaren balio-bizitza kalkulatu eta erabilera arrazionalizatu daiteke. 

• Energia-eskariaren eta -sorkuntzaren eredu prospektibo geoerreferentziatuak, energia-eskaria elikatzeko zer sare mota eta noiz beharko ditugun identifikatzeko. 

• SW tresnak, energia-sorkuntza banatutik eta eskaritik lor dezakegun malgutasuna kudeatzeko, eta sarerako aprobetxamendua optimizatzeko.

• Azpiestazioetan eta sare elektrikoetan zibersegurtasun-arriskuak aurreikusteko eta zibererasoetatik babesteko soluzioak 

Eremu digitalean, sare elektrikoko operazioen eraginkortasuna areagotzeko gai diren aplikazioek izango dute protagonismoa. Biki digitalez, edge computingez, Gauzen Internetez, robotikaz, gizakiaren eta makinaren arteko interakzio aurreratuaz eta nola ez, zibersegurtasunaz eta IAk prozesu guztietan duen inplikazioaz ari gara. 

Halaber, arreta handiagoa jarriko diogu sarearen plangintzari; izan ere, ikuspegiak holistikoagoa izan behar du, eta ziurgabetasun-maila handiagoa txertatu behar da, besteak beste, industriaren eta garraioaren sektoreek deskarbonizatzeko behar duten bilakaera teknologikoaren arabera.

Eta, azkenik, ez ditugu ahaztu behar teknologiarik elektroteknikoenak, ezinbestekoak izaten jarraituko baitute sareei erresilientzia eta segurtasuna emateko: potentzia-elektronika, grid-forming inbertsoreen hedapen zabalarekin; biltegiratze elektrikoaren txertaketa sareen kudeaketan, eta DC eta AC sareen arteko hibridazioa tentsio-maila desberdinetan.