TECNALIA BIEMH 2022 bienalean: manufaktura-industria berria elkarrekin sortzen

MANUFAKTURA-INDUSTRIA BERRIA ELKARREKIN SORTZEN

Industria-enpresa berria ez da etorkizuneko kontua, abian da dagoeneko. Inguruan duzu, eta TECNALIA bazkide aproposa da elkarrekin eraikitzeko.

Inoiz baino gehiago esperotako makina-erremintaren nazioarteko bienalaren 31. edizioa, BIEMH 22, ziurgabetasun handiko giroaren ondotik etorri da. Industria-enpresek beren burua berrasmatu egin behar izan dute, eta soluzio berriak sortu dituzte, lehiakortasunari eusteko eta etorkizunerako erresilientzia irabazteko.

Denbora honetan guztian, askotariko industria-enpresekin lankidetzan jardun dugu gure gaitasun multiteknologiko eta multisektorialari esker. Ildo horretan diseinatu eta zabaldu ditugun soluzio teknologikoekin, negozio-erronkei ez ezik, gizartearen eta ingurumenaren alorreko desafioei ere erantzun diegu.

Elkarrekin eginiko ibilbide honetan ikasi eta eraiki dugun guztiari esker, TECNALIAREN standa sortu dugu, eta bertatik bertara probatu ahal izango duzu zer-nolakoa den industria-enpresa berri hori. Esku-eskura ipintzen ditugu industria-enpresen esparru guztietan eragiten duten berrikuntza erabakigarri guztiak, lehiakorrago eta jasangarriago bilaka daitezen. Ildo horretan, hona hemen bilakaera horrekin lortu nahi ditugun xedeak:

Industria erresilienteago bihurtu da, fabrikazio-baldintzetan edozer aldaketa denean. Fabrikazio-ingurunea eraldatu egiten da; agertoki horretan, industria mugitu egiten da eta produkzioa arinago bihurtzen da. Askotariko ekipamenduak konektatzen dira, eta modu mugikor eta malguan jarduten dute lankidetzan, urrunetik eraginak izateko aukerarekin eta erraz berrentrenatzeko moduan.

Oztopoak ezabatzen dira, eta, hala, pertsona guztiak eszenaren erdigunean ipintzen dira; datuaren adimenari esker, enpresaren alderdi guztiak kontrola eta ikuskatu ditzakete, noiznahi eta nonahi, modu naturalean eta azalpenez, analisi aurreratuko ezagutza adituaren beharrik gabe.

Fabrikazio-teknologiak integratu egiten dira, eta, hibridazio fisikoa eta digitala lortzeaz gainera, ingurumen-inpaktua ere murrizten da, soluzio efizienteagoak, arinagoak, kontsumo apalagokoak eta jasangarriagoak baliatzen baitira.

Enpresak ateak irekitzen ditu, eta bezeroekin eta balio-katearekin konektatzen ditu soluzioak zuzenean. Hala, bereiziago bihurtzen ditu eta fidelizazio handiagoa lortzen du; horretaz gainera, balio erantsiko zerbitzu gehiago izateko aukera eskaintzen du, negozioa indartzeko diru-sarrera iturri osagarriekin.

Ez bazenuen izan modurik BIEMH 2022 bienalera joateko edo berriro bisitatu nahi baduzu gure erakustokia, sartu lasai eta probatu beste zenbait enpresarekin elkarlanean dimentsiootan guztiotan aurrera egiteko garatu ditugun soluzio teknologikoak, industria-enpresa lehiakorragoak eta jasangarriagoak lortzeko.

Berrikuntza erabakigarri horien berri izan dezazun, lau eremu berezi prestatu ditugu, eta, haien bidez, industria-enpresa berriko lau gune erabakigarri bisitatu ahal izango dituzu. Era berean, nabarmenduta ikusiko dituzu lehiakortasunean ez ezik jasangarritasunean ere aurrera egiten laguntzen duten soluzioak. Izan ere, gure ikuspegi estrategikoak xede garbia du: gure berrikuntza guztiek inpaktu ekonomikoa eta soziala ekartzea.

Manufacturing Stage: ekoizpen arina edozer fabrikazio-agertokitara egokitzen den tokia

Ekoizpen-sistema askoz konfiguragarriagoak eta eskatutako produktu-aldaeren gehikuntzara hobeto molda daitezkeenak lortu ahal izateko, “ekoizpen arineko” gune bat erakutsiko dizugu, MANUFACTURING STAGE gisa antolaturik. Gune horretan, fabrikazioa askotariko eskakizunetara egokitzen da, hainbat roboten eta plataforma mugikorren bidez.

BIEMH 22ko erakustokian zabaldu dugun fabrikazio-agertokian bertatik bertara ikus daitezke zer garapen egin dituen TECNALIAk plataforma robotiko mugikorren multzo bat modu adimendunean koordinatzeko. Plataforma horiek, elkarren artean sinkronizaturik, lankidetzan jarduten dute (fabrikatzailea edozein izanik ere), automatiza ditzaketen prozesu-konbinazio ugarietako batzuk egiteko:

Robot zentral bat, TECNALIAk garatutako Autorecon plataforma mugikor baten gainean: beste robot guztiekin batera sinkronizaturik jarduten du, piezak soldatzeko eta ikuskatzeko zikloa osatzeko, eta, gainera, beste pieza-tipologia baten bizarrak kentzeko prozesua konpontzen du.
Inguruan, Robotnik etxeak hornitutako bi AGV ditu, piezen barne-logistika konpontzeko roboten artean, bai eta Manufacturing Stagea inguratzen duten produkzio-makinak ere.
Robot gehigarri bat ere badu Autorecon plataforma mugikorraren gainean, zeina robot zentralaren piezen barne-logistikarekin sinkronizatzen baita, haien gainean soldadura-lana egiteko.
Roboutón bi besoko robot mugikorrak (TECNALIAk garatua Kuka eta Robotnik etxeen teknologiarekin) pieza soldatuak ikuskatzen ditu 3D ikusmenaren bidez, eta hirugarren pieza-familia baten leunketaz ere arduratzen da.

Estazio interaktibo bat ere badu (Fegemu Solutions etxeak hornituriko robotekin), TECNALIAren programazio errazeko aplikazioak probatzeko, eta, hala, fabrikatzaile desberdinek egindako eta askotariko kontrolak dituzten roboten lanak konfiguratzeko.

Bete formularioa, eta deskargatu TECNALIAren industria-enpresa berrirako arrakasta-kasuen bilduma.

Digital Brain: 360°-ko aginte digitala, industria-enpresaren alderdi guztiak noiznahi eta nonahi kontrolatzeko

“Aginte digitaleko zentro” edo DIGITAL BRAIN bat aurreikusten dugu, enpresaren alderdi guztiak kontrolatzen dituzten aplikazioak zentralizatzen dituena. Hala, pertsonen zerbitzura jartzen da datuaren adimena, lanean laguntzeko, 360°-ko ikuspegiarekin. Ikuspegi horrek oztopoak ezabatzen ditu, eta noiznahi eta nonahi kontrola daiteke, modu naturalean eta azalpenez, analisi aurreratuko ezagutza adituaren beharrik gabe.

DIGITAL BRAIN espazio digitalean, esku-eskura ipintzen dizugu “aginte-zentroa”, zeinean industria-enpresekin batera eginiko zenbait garapen baitaude, haien negozioaren alderdi erabakigarrien kontrol adimendunean aurrera egiteko:

DENNDATA kalitate-analisi eta -aurreikuspenerako aplikazio bat da, DENN fabrikatzailearena, zeinak txapa deformatzeko makinak diseinatzen baititu hainbat teknologia-mota baliatuz. DENNDATAri esker, piezen haustura-prognosia egin daiteke, aurreko fabrikazio-sorten datuen gainean sortutako eredu matematikoekin. Horri esker, zehaztu daiteke prozesuak esperotako maila operatiboen barruan diharduen ala ez, eta gai ote den ohiko akatsak automatikoki zehazteko.
VIXION plataformaren bidez lor daitezkeen abantailen artean ageri dira, esaterako, urruneko monitorizazio integrala (IIoT), sentsore gehiago biltzea, sistemak integratzea eta aplikazio espezifikoak sortzea, bai makinen errendimendua, bai makina horien mantentze-lanetan eragiten duten faktore erabakigarriak monitorizatzeko.
SZENDEX logistika- eta mezularitza-enpresa espezializatu bat da, eta presentzia handia du osasun-sektorean, zeinean erabakigarriak baitira trazagarritasuna eta bidalketa-denborak. BIOFRAME soluzioak edukiontzi adimendun bat dauka, hodeiko plataforma eta guzti, eta, hari esker, automatikoki eta denbora errealean jakin daiteke bidean dauden bidalketen trazagarritasun-historia eta kokapena. Edukiontziko sarbideak NFC bidezko kontrol-sistema bat dauka, bai eta tenperatura- eta erorketa-sentsoreak ere.

Soluzio horiei esker, negozio-lerro berriak lortu ahal izan dira, bai eta oinarri teknologikoko enpresa berriak sortu ere. Soluzio horiek guztiek erakusten dute TECNALIAk orpoz orpo jardun duela lankidetzan askotariko industria-enpresekin, prozesuak digitalizatzeko bidean. Bildutako informazio digitala jakintza bilakatzen dugu, prozesuen kalitatea hobetzeko eta optimizatzeko, material- eta energia-kontsumoen efizientzia lortzeko, eta negozioaren jauzi kualitatiboa ekarri duten zerbitzuak eskaintzeko.

Bete formularioa, eta deskargatu TECNALIAren industria-enpresa berrirako arrakasta-kasuen bilduma.

Innolab: Fabrikazio fisikoak eta elementu digitalak elkartzen diren tokia, inpaktu ekonomiko eta sozial handiko garapen berriak sortzeko

INNOLABen, industria-enpresak fabrikazio fisikoa eta elementu digitalak lotzen dituzten garapen berriak kontzeptualizatzen eta ontzen ditu, eragin ekonomiko eta sozial handiko soluzio disruptiboak asmatzeko, eta, hala, prozesuak eta produktuak eraldatzeko.

Pertsonekin lankidetzan aritzen diren eta industriako prozesu osagarriak optimizatzen dituzten sistema robotiko berrietan berrikuntza disruptiboena erakusteko, lau hankako robot bat izango da standean, mugitzeko ahalmenez eta ingurunearen ezagupen adimendunez hornitua. Ederki erakusten du zer-nola integratu ditugun robot-modelo berriak askotariko industria-aplikazioetarako robotika malguko eta adimen artifizialeko teknologietako garapenekin: industria-inguruneen monitorizazioa (bai teleoperatua, bai autonomoa), instalazioak mapatzea, pertsonentzako arrisku handiko inguruneetarako sarbidea, eta abar.

BIEMH 2022ko gure standeko INNOLAB gunean, orobat, elektronika inprimatuko teknologiek eskaintzen dituzten aukerak ere aurkezten ditugu, dela industria-garapenak osagai arinen bidez bilakarazteko, dela soluzio efizienteagoak, kontsumo apalagokoak eta jasangarriagoak lortzeko.

Horretaz gainera, garapenak ere baditugu ikusgai. Adibidez:

TUBACEXerako fabrikaturiko hodi metalikoak, tenperatura-sentsorez eta haririk gabeko komunikazio-gaitasunez hornituak.
Botoitegi kapazitiboak eta konpositean txertatutako argiztapen-zirkuituak, konpositearen propietate estrukturalak murrizten ez dituen teknologia patentatuarekin.
ANTOLÍN etxearentzako ate-edergarria, kolore estrukturalen eremuarekin, 3D Direct Printing teknologia patentatuarekin fabrikatua.
Metal gaineko serigrafia bidez inprimaturiko berogarria, izotz-kontrako sistemarako estaldura dielektrikoarekin, izotza sortzea eragozteko.
Elektrospinningean oinarritutako teknologia patentatuarekin fabrikatutako estalkiak, tenkagarritasun handiko ehunekin ijeztu daitezkeenak.

Bete formularioa, eta deskargatu TECNALIAren industria-enpresa berrirako arrakasta-kasuen bilduma.

Extended Services: Ikusmolde zabalago bat, industria-enpresaren eta haren balio-katearen arteko harremana eta interkonexioa indartzeko

EXTENDED SERVICES guneak erakutsiko dizu teknologia digitalak gai direla instalazio fisikoak “irekitzeko” eta industria-enpresaren eta haren balio-katearen arteko komunikazio askoz ere murgiltzezkoagoa, efizienteagoa eta seguruagoa lortzeko, lankidetzan aritzeko eta zerbitzuak emateko.

Gune honetan, TECNALIAk sorturiko soluzio digitalen aldeko apustua egiten dugu. Haien bidez, interakzioan jardun ahalko duzu, industriak erraz integra ditzan teknologia horiek: zerbitzua emateko modua hobetzeaz gainera, bezeroak informazio baliotsua eskuratzeko modua ere eraldatuko da.

KAYROX web-plataforma TECNALIAk garatua da, esperientzia immertsiboak erraz eta jakintza teknikorik gabe sortu eta kontsumitu ahal izateko, errealitate birtualeko eta areagotuko teknologien bidez, edukia edozer gailutan kontsumitzen dela ere. KAYROX baliaturik, enpresa batek bi eratako zerbitzuak eraiki ditzake:

Urruneko laguntza-zerbitzu bat, zeinaren bidez adituak urrunetik eta denbora errealean konpondu baititzake mantentze-lanekin loturiko arazoak, baita makinan ari diren langileei jarraibideak eman ere.
Murgiltze-esperientziak sortzea; haien bidez, bezeroak birtualki bisitatu ditzake gure instalazioak, interakzioan jardun dezake ekipamenduarekin, eta bisualki berrikus ditzake funtzionamendua eta prestazioak. Zerbitzu hori probatzeko, bisita birtual bat egin dezakezu TECNALIAren Robotika Laborategira. PCa, tableta edo murgiltze-betaurrekoak balia ditzakezu bisitaldirako.

Zerbitzu areagotu horien adibide osagarri gisa, MyTecnalia plataforma aurkezten dizuegu, TECNALIAren eta gure bezeroen arteko proiektuak urrunetik kudeatu ahal izateko sortua. Plataforma horrek indartu egiten du enpresekin dugun 360°-ko komunikazioa: enpresek laborategi fisikoekin konbina dezakete interakzioa, erreminta digitalen bidez konektaturik.

EXTENDED SERVICES gune honetan, azaltzen dizugu, orobat, zeinen erabakigarria den zibersegurtasuna garapen-aldi osoan, zeinean gure balio-katera digitalizatzen baitugu konexioa. Era berean, industria-ekipamenduak erasoetatik babesteko zer garapen ditugun ere erakusten dugu.

Bete formularioa eta deskargatu TECNALIAren industria-enpresa berrirako arrakasta-kasuen bilduma.