CO₂-aren garraioa, banaketa, injekzioa eta metatzea: azpiegituren integritatea eta materialen bateragarritasuna CCUSaren hedapenerako
Karbonoa atzemateko, erabiltzeko eta metatzeko(CCUS) proiektuen ezarpena hedapen-fasean sartzen ari da Europan. Etapa berri honetan, proiektuen bideragarritasun tekniko, ekonomiko eta arauzkorako funtsezko baldintza bihurtu da segurtasuna, fidagarritasuna eta integritatea bermatzea CO₂-a garraiatzeko, banatzeko, injektatzeko eta metatzeko azpiegituretan.
Atzemandako CO₂-aren korronteetan ezpurutasunak egoteak, fase dentsoko edo superkritikoko funtzionamendu-baldintza zorrotzekin batera, korrosio-fenomenoak, azidoak eratzea eta materialak degradatzea eragin ditzake, eta horiek arriskuan jartzen dute hodien, injekzio-putzuen eta beste ekipo kritiko batzuen errendimendua. Hori dela eta, materialen portaera ulertzea eta arintze-estrategia eraginkorrak garatzea giltzarri da karbonoaren balio-kate seguru eta eraginkor baten bidean aurrera egiteko.
- Helburu horrekin, TECNALIAk jardunaldi tekniko bat antolatuko du urriaren 7an Madrilen, eta CCUS teknologien ekosistemako eragile industrial eta teknologiko nagusietako batzuk bilduko dira bertan.
- Topaketako parte-hartzaileen artean, DNV, ENAGAS, NORTEGAS, REPSOL, TUBACEX, VALLOUREC eta OLI SYSTEM egongo dira, eta, haiekin batera, hainbat azpiegitura-operadore, proiektu-garatzaile, energia-enpresa, material-fabrikatzaile eta nazioarteko aditu; horiek guztiek esperientziak, kasu praktikoak eta erronkak partekatuko dituzte CO₂-aren garraioaren, injekzioaren eta metatze geologikoaren alorrean.
Jardunaldian jorratuko diren erronka teknologiko nagusiak
Workshopean zehar, CO₂-korronteen kudeaketarekin eta azpiegituren integritatearekin lotutako erronka tekniko nagusiak aztertuko dira.
- Azidoen eraketa eta acid dropout fenomenoak.
- Korrosioa hodietan, putzuetan eta prozesu-ekipoetan.
- Material metalikoen bateragarritasuna eta degradazioa.
- Ezpurutasunen inpaktua; besteak beste, hauena: H₂O-a, O₂-a, H₂S-a, NOx-ak eta SOx-ak.
- CO₂-aren kalitate-espezifikazioak, sistemen integritatea bermatzeko.
- CO₂-aren garraio, banaketa, injekzio eta metatzearekin lotutako arrisku operatiboak.
CO₂-aren balio-katean lankidetza bultzatzeko foroa
Jardunaldia, gainera, topagune izango da erronka komunak identifikatzeko, ezagutza teknikoa partekatzeko eta industriaren, operadoreen, material-fabrikatzaileen, teknologia-zentroen eta erakunde publikoen arteko lankidetza-aukerak esploratzeko.
Ekitaldi osoa ingelesez izango da, eta honako hauei zuzenduta dago bereziki:
- CO₂-a eta gasa garraiatzeko sareen operadoreak.
- Energia-enpresak eta CCUS proiektuen sustatzaileak.
- Emisio intentsiboko industriak (zementua, findegiak, kimika eta siderurgia, besteak beste).
- Materialen, osagaien eta ekipoen fabrikatzaileak.
- Ingeniaritza-enpresak eta EPC kontratistak.
- Administrazio publikoak eta profil teknikoko erakunde arautzaileak.
Esparru horietakoren batekoa izan arren gonbidapenik jaso ez baduzu, gurekin harremanetan jar zaitezke zeure parte-hartzeari buruzko informazioa eskatzeko.