"Tresnak ebaluatzen du zer prestakuntza-maila duten higiezinek beren balio kulturala arriskuan jarri gabe teknologia adimendunak integratzeko"
TECNALIAk web-tresna berritzaile bat garatu du, bizitegiak ez diren Europako eraikin historikoen trantsizio digitala eta energetikoa bizkortzeko
Pauso bat eman dugu Europako ondare arkitektonikoaren modernizazio jasangarrirantz: web-tresna berri bat garatu dugu, bizitegiak ez diren eraikin historikoen Smart Readiness Indicator (SRI) adierazlea kalkulatzeko. Soluzio berritzaile horrek —SMARTeeSTORY ekimenaren esparruan aurkeztuak— ebaluatzen du zer prestakuntza-maila duten higiezinek beren balio kulturala arriskuan jarri gabe teknologia adimendunak integratzeko.
Efizientzia energetikoko, konektibitateko eta automatizazioko soluzioak hartzea
Tresnaren oinarria Europako Batzordearen SRIaren kalkulu-metodo ofiziala da. Analisi-ingurune intuitibo bat eskaintzen du, zeinak jabeen, administrazioen eta energia-adituen lana errazten baitu.
Sistemak, duen diseinu espezializatuari esker, ondare-eraikinen berezitasunetara egokitutako irizpideak txertatzen ditu. Horri esker, higiezinak soluzio adimendunak hartzeko duen gaitasuna baloratzeko aukera sortzen da, honako eremu hauetan:
- Energia-efizientzia
- Konektagarritasuna
- Automatizazioa
- Energia berriztagarrien integrazioa
Esku-hartzeen bideragarritasun tekniko eta ekonomikoaren ikuspegi osoa eskaintzen du
Bertsio berrian egindako hobekuntzen artean, azpimarratzekoa da aukera ematen duela hautatze-irizpideak definitzeko, energia-, ingurumen- edo ekonomia-lehentasunen arabera. Halaber, nabarmentzekoak dira gomendio pertsonalizatuak, ondare babestuaren berezko mugekin bateragarriak diren esku-hartzeak planifikatzeko. Sistemak, gainera, finantza-modulu bat du, jardueren errentagarritasuna aztertzen duena eta ikuspegi osoa ematen duena bideragarritasun teknikoaren eta ekonomikoaren aldetik.
TECNALIAk gidatu du tresnaren garapena, eta, finantzei lotutako alderdietan, RINA-Cren laguntza izan du. Zenbait optimizazio tekniko ditu, haren erabilera errazteko eta Europako hainbat agertokitan aplikatzeko aukera areagotzeko.
Hiru eraikin errealetan baliozkotutako tresna
Rigan (Letonia), Granadan (Espainia) eta Delften (Herbehereak) dauden hiru eraikin erakusletan egiaztatu da sistema. Ingurune erreal horiei esker, baliozkotu da tresnak Europako zenbait testuingurutan duen baliagarritasuna, eta agerian utzi da zer ahalmen duen, eraikitako ondarearen esparruan, birgaitze digitalari eta energetikoari buruzko erabakiak babesteko.
Ekimen horren bidez, TECNALIAk sendotu egin du kultura-ondarearen kudeaketaren berrikuntzarekin duen konpromisoa, eta jasangarritasuna, efizientzia eta ondare arkitektonikoaren zaintza uztartzen dituzten tresnen ekarpena egin du.