"DEREMCOren helburua da, materiak konposatuen balio-bizitza amaitzen denean material konposatu horiek berreskuratu eta berrerabiltzea"
Material konposatuen hondakinak zuntz birziklatuko material erdilandu bilakatzeko prozesu jarraitu berria
Material konposatuen birziklapenean emandako aurrerapauso teknologiko bati esker, hondakin konplexuetatik birziklatutako zuntzen balioa handitzeko ahalmena duen prozesu jarraitu bat garatu ahal izan da. Horrela, material horiek berriro erabil daitezke plastikoaren eta konpositeen industrian.
Teknologiaren oinarria da modu kontrolatuan aplikatzea estaldurak eta koipeztadurak (sizing) zuntz birziklatu etenetan. Hala, matrize polimerikoekiko bateragarritasuna berreskura daiteke, erabilgarritasuna hobetu eta lortutako material konposatuen azken propietateak optimizatu. Emaitza produktu erdilandua da, feltro erakoa, ohiko industria-prozesuetan erraz txertatu daitekeena.
Garapen hori Europako DEREMCO (GA zenbakia: 101084037) proiektuaren barruan dago. Ekimen horrek soluzio berritzaileak bultzatzen ditu material konposatuak berreskuratzeko eta berrerabiltzeko haien balio-bizitzaren amaieran, ekonomia zirkularrean oinarritutako industria-ereduak bultzatzeko.
- Proiektuaren barruan, instalazio pilotu bat diseinatu eta baliozkotu da, eskuratutako zuntz birziklatuei estaldura berria aplikatzen diena birziklatze-prozesu pirolitiko edo kimiko ez-selektiboen bidez. Tratamendu horietan, zuntzek jatorrizko sizinga galdu ohi dute; horrek polimeroekin bateragarritasun gutxiago izatea eragiten du, eta aplikazio industrialetan manipulatzea zailtzen du.
- Prozesu berriarekin, funtzionaltasun horiek berrezarri dira modu erraz eta efizientean, eta kostu eskasarekin.
- Estaldura aplikatzeaz gain, sistemak aukera ematen du zuntz birziklatuak feltro eran antolatzeko. Horri esker, askoz errazagoa da erabiltzea, gordetzea eta, ondoren, eraldatzea. Tratatutako zuntzak hainbat prozesutan erabil daitezke; esate baterako, plastiko-injekzioan eta material konposatuen moldaketan.
Prozesuaren abantaila nagusiak
- Prozesua jarraitua eta erraza da, ekonomikoki bideragarria eta industrian garatzeko egokia.
- Feltro formatuak zuntz birziklatuen manipulazioa hobetzen du.
- Sizing-kantitate txiki baten aplikazio kontrolatua.
- Osagai termoplastiko gutxi eta kontrolatua azken emaitzan.
- Plastiko indartuen eta material konposatuen propietate mekanikoak hobetzen ditu.
- Feltroaren gramajea doitu egin daiteke, aplikazio industrialaren arabera.
- Bateragarria da konpositeak eta plastikoak eraldatzeko industria-prozesuekin.
Garapen horrek zirkularitateranzko pauso garrantzitsu bat da material konposatuen industrian, eta DEREMCO proiektuaren helburuekin lerrokatuta dago: hondakin konplexuak balio erantsi handiko lehengai berri bilakatzea. Horrelako soluzioei esker, besteak beste, haize-energiaren, garraioaren edo aeronautikaren sektoreetatik lortutako zuntzak ekoizpen-ziklo berrietan sar daitezke.
Industrian inpaktua duen eredu praktikoa
Adibide esanguratsu bat beira-zuntza edo karbono-zuntza erabiliz fabrikatutako aerosorgailu-palak edo osagai aeronautikoak birziklatzea da. Prozesu termikoak edo kimikoak erabiliz birziklatu ondoren, berreskuratutako zuntzek beren funtzionaltasuna galtzen dute, neurri handi batean. DEREMCOn garatutako teknologiari esker, zuntz horiek berriro estali eta feltro berrerabilgarri bilakatu daitezke, konpositezko piezak, egitura-panelak eta osagai erdi-egituratzaileak fabrikatzeko, adibidez.