Barakaldon egingo da familiei eta ikasleei zuzendua dagoen zientziari eta klima-aldaketari buruzko ekitaldi zientifiko handiena

Barakaldon egingo da familiei eta ikasleei zuzendua dagoen zientziari eta klima-aldaketari buruzko ekitaldi zientifiko handiena

• Ekimenak OREgaua du izena, eta doakoa da. Irailaren 26an izango da, ostiralarekin, Barakaldoko Lasesarre kiroldegian, 17:00etatik 22:00etara; 2.000 m²-ko eremu batean, zientziarekin eta klima-aldaketarekin lotutako esperimentuak eta tailerrak izango dira, 100 ikertzaile boluntario bertan direla
•  OREgauak Ikertzaileen Europako Gaua ospatzen du, eta, aurten, klimaren arazoa ardatz hartu, eta kalera hurbilduko du. Ekitaldia aldi berean egingo da Europako hainbat hiritan, eta Barakaldon “Made in Euskadi” zientzia hartuko da soluzioaren ardatz
•  ORE4citizens proiektuaren parte da ekimena. TECNALIA da proiektuaren buru, EHUrekin, Euskampus Fundazioarekin eta BCAM Basque Center for Applied Mathematics zentroarekin batera

Barakaldo, 2025eko irailaren 16a. Irailaren 26an, klima-aldaketaren erronkari buruzko dibulgazio zientifikoko ekitaldirik handiena egingo da Barakaldon. Herri horrek hartuko du OREgauaren bigarren edizioa. Ikertzaileen Europako Gaua da OREgaua, eta Europako hiri askotan ospatzen da aldi berean.

Lasesarreko kiroldegian izango da, 17:00etatik 22:00etara, eta 2.000 m²-ko gune bat hartuko du, energia berriztagarriekin lotutako tailer, esperimentu eta erakustaldiekin, eta klima-erronkarako “Made in Euskadi” soluzio teknologikoekin. Sarrera doan izango da hurbildu nahi duten familia guztientzat, eta ez dago aldez aurretik izena eman beharrik; 3 urtetik gorako umeentzat izango dira jarduerak.

OREgaua ekimena ORE4citizens europar proiektuaren barruan dago. ORE4citizens euskal zientzialariek sustatutako aliantza bat da, TECNALIA duena buru, Euskal Herriko Unibertsitatearekin (EHU), Euskampus Fundazioarekin eta BCAMekin (Basque Center for Applied Mathematics) lankidetzan. Aurten, Barakaldoko Udalaren, sektoreko 20 erakunderen eta ehun bat ikertzaile boluntarioren babesa du.

OREgaua gaur aurkeztu dute Barakaldoko alkate Amaia del Campok eta ORE4citizens proiektuaren zuzendari eta TECNALIAko ikertzaile Eider Roblesek. Aurkezpenean OREgauaren jarduerak eta Europako proiektuaren izateko arrazoia xehatu dituzte.

Jarduerak

Hilaren 26ko egitarauan, arratsaldean zehar, tailerrak, jolasak, hitzaldiak eta esperimentuak daude, adin guztietarako. Horrez gain, ikastetxeen arteko lehiaketa bat izango da, eta jarduera-kopuru bat osatzeagatik parte-hartzaile diploma bat eskuratzen dutenek sari bat lortzen lagunduko diete beren ikastetxeari eta ikasgelari.

Jardueretan parte hartzeko, ez da izena eman beharrik, urpeko igeriketako hastapenetarako izan ezik:

• Urpeko robotak igerilekuan erabiltzeko lehiaketa. Urpeko robotak ezinbestekoak dira urpean dauden egiturak ikuskatzeko. Haien bidez, gailuen osotasuna begiratzen da mantentze-lanak planifikatzeko, baita itsasoan ezkutatzen den fauna ugaria behatu ere. Jarduera honekin, zer robot-mota erabiltzen den ikusi ahal izango da, eta prototipo batzuk ikusi eta erabili.
• Droneen hegaldiak. Droneen bidez, ikuskatze-misioak egin daitezke, egituren mantentze-lanak planifikatzeko. Hegaldi batzuk egingo dira, oso misio berezi batekin, zeina zuzenean ikusi ahal izango baita.
• Aerosorgailuen maketak muntatzeko lantegia. Aerosorgailu bat zer den, zer atal nagusi dituen eta itsasoan nola instalatzen den ikasiko dute. Horretarako, eskalako aerosorgailuak izango dituzte, benetan energia sortzen dutenak eta igerilekuan sartu ahal izango dituztenak.
• Laborategiko esperimentuetarako pentsatutako 20 txoko baino gehiago izango dira, bertaratzen direnei aukera emango dietenak askotariko tailer dibertigarriak egiteko: flotagarritasuna, materialen ur gazitako korrosioa, etab.
• Itsas energia berriztagarriei buruzko “Made in Euskadi” proiektuen erakusketa Itsas energia berriztagarrien inguruan euskal enpresek landu dituzten azken proiektuen erakusketa (maketak, argazkiak eta informazio-panelak).
• Euskal emakume zientzialarien argazki-erakusketa.
• Gamer gunea: klimaren aldeko bideojokoak.
• 16 eta 17 urteko ikasleek osatutako Hydrogyrios taldeak bere SARAMS robota erakutsiko du (gaztelaniazko siglek “itsaspeko laginak bildu eta analizatzeko sistema automatikoa” esan nahi dute), urpeko laginak modu eraginkorrean bildu eta aztertzen dituena. SARAMSekin lehiatu dira Asia Pacific Open Championships txapelketan, Sydneyn (Australia).
• TXIKIGUNEA: haurrentzako gunea, non izango baitira aurpegi, jolas eta eskulanak, eta ipuin-kontalaria, zeinak modu dibertigarrian adieraziko baitie olatuen, haizearen eta mareen indarra. Jolasteko, imajinatzeko eta ikasteko gune bat. Sormenezko jarduera partizipatiboen bidez, itsasoaren eta itsasoko energia berriztagarrien mundu liluragarria ezagutuko dute haurrek.
• Urpeko igeriketaren hastapenak Aketxe Klubarekin (irailak 27, larunbata). Urpean igeri egiteko ekipoarekin murgiltzea Santurtziko igerilekuan, urpeko sentsazioak esperimentatzeko. Izena eman behar da aurrez. Gutxieneko adina, 18 urte. 20 lagun gehienez.

ORE4citizens

ORE4citizens euskal emakume zientzialariek bultzatu eta Europar Batasunak finantzatutako aliantza bat da. 60 ikertzailek eta 20 euskal erakundek baino gehiagok bat egin dute harekin, zientzia herritarrengana hurbiltzeko, klima-aldaketak euskal kostaldean dituen ondorioak ezagutarazteko eta energia berriztagarriek —bereziki itsasokoek— berotze globalaren aurkako borrokan duten funtsezko eginkizunaren berri emateko. Ekimen horren bidez, gainera, nabarmendu nahi dute euskal industria lider dela sektore horretan mundu zabalean, eta aukera bikaina eskaintzen duela gizartearentzat eta planetarentzat. Ekimen horrek zenbait jarduera aurreikusten ditu datozen bi urteetan Euskadiko udalerrietan, herritarrekin eta ikastetxeekin orpoz orpo.

Klima-aldaketak erronka nabarmenak ditu euskal kostalderako, bai ingurumenaren gaineko inpaktu fisikoen aldetik, bai kostaldeko komunitateen gaineko inpaktu sozioekonomikoen aldetik. Garrantzitsua da neurriak hartzea aldaketa horietara egokitzeko eta klima-aldaketak eskualdean dituen ondorioak arintzeko. Itsasoko energia berriztagarriak garatzeak eta hedatzeak lagundu egiten du arintze horretan. Hori horrela, trantsizio energetikorako gakoetako bat da maila globalean epe ertain eta luzerako, haren sorkuntza-potentziala dela eta. Aldi berean, energia-mota hori aukera industrial, ekonomiko eta soziala da Euskadirako, eta bateragarria da itsas ingurunea babestearekin.