"Soluzioak ardatz hutseko errotore bat daukan makina elektriko bat konbinatzen du"
EGILE MECHANICSek eta TECNALIAk prestazio handiko bizikleta elektrikoetan pedalei eragiten laguntzeko soluzio bat garatu dute
Hazitek BIKING ekimenak pedalei eragiten laguntzeko soluzio berri bat garatzea eta baliozkotzea ahalbidetu du. Soluzioak pare-dentsitate handiko motor konpaktu bat, kontrol-elektronika aurreratua eta sentsorika adimenduna ditu oinarri, eta errepideko eta mendiko bizikleta elektrikoen belaunaldi berrira bideratuta dago.
EGILE MECHANICS eta TECNALIA elkarlanean aritu dira Hazitek BIKING proiektuan, pedalei eragiten laguntzeko soluzio bat garatzeko. Soluzio horrek bizikleta elektrikoen integrazioa, pisua, zarata eta propultsio-sistemen prestazioak hobetzen ditu.
Garatutako soluzioak bi elementu konbinatzen ditu: ardatz hutseko errotore bat daukan makina elektriko bat, zeina pedalierraren ardatzarekin lerrokatuta baitago, eta EGILE MECHANICSek diseinatutako transmisio zikloidal bat. Arkitektura horrek soluzioa modu trinkoagoan integratzea ahalbidetzen du, baita bizikletak estetikoki ohiko bizikleten antz handiagoa izatea ere.
Pedalei eragiten laguntzeko sistema arin, trinko eta eraginkorragoa
- Proiektuaren barruan, TECNALIAk kontrol- eta potentzia-elektronika, motorra kontrolatzeko software integratua eta pedalei eragiten laguntzeko algoritmoak garatu ditu, erabiltzaileak erantzun natural, zehatz eta eraginkorragoa jaso dezan. Era berean, sistemaren baliozkotze funtzionala egin du banku-proben eta bizikleta-proben bidez.
- Bestetik, BIKONEk sisteman integratuta dagoen pare- eta kadentzia-sentsorea eman du. Sentsore horrek kontrolak erabiltzen duen informazioaren kalitatea hobetzen du, eta txirrindulariaren ahaleginari hobeto egokitzen zaion laguntza ahalbidetzen du.
Egindako saiakuntzen bidez probatzailea benetako erabilera-baldintzetan baliozkotu dute, eta etorkizuneko industrializazio- eta merkaturatze-faseetara begira etorkizun handia daukaten emaitzak lortu dituzte. Proiektuak, gainera, bizikleta elektrikoaren sektorean mugikortasuneko soluzio jasangarriago eta aurreratuagoak garatzen laguntzen du.
