Hidrogenoa lehian dabil etorkizuneko energia berriztagarria bihurtzeko

TEKNOPOLISek, Elhuyarrek ETBrentzat ekoitzitako programa batek, erreportaje bat egin du non azaltzen baitu zer abantaila dituen eta zer erronkari egin behar dion aurre hidrogenoak energia-iturri berri gisa. Erreportajean, halaber, aukera eman dute Energiaren Euskal Erakundeak aurkeztutako Hidrogenoaren EAEko Estrategiaren ildoan doazen zenbait proiektu ezagutzeko: hidrogenoaren EAEko korridorea, H2SITE mintz-erreaktorea eta BenortH2 elektrolizazio-instalazioa.

Parisko akordioan erdietsitako konpromisoen arabera, atmosferara isurtzen dugun CO₂-a % 45 murriztu beharko litzateke 2030erako, eta isuri-maila neutroa iritsi 2050ean. Ekonomia deskarbonizatzeko, erregai fosilak ordezkatuko dituzten energia alternatiboak behar dira; lehia horretan, hidrogenoa aurreratzen ari da.

Hidrogenoaren abantailak

• Energiaren Euskal Erakundeko Energia Efizientziako eta Jasangarritasuneko Arloko Juan Manuel Fernándezek adierazi duenez, “hidrogenoak abantaila nagusia du metatu eta garraia daitekeela. Energia berriztagarrietatik ekoitz daiteke, eta, gero, nahi dugunean kontsumitu”.
• Petronor da hidrogeno-ekoizle nagusia Euskal Autonomia Erkidegoan, baita hidrogeno-kontsumitzaile nagusia ere. Gaur egun, ez dute energia-iturri gisa erabiltzen, baizik petrolioa fintzeko lehengai gisa. Ideia da hidrogeno berdea fabrikatzen hastea, bere ekoizpen-prozesuak deskarbonizatzeko. Elías Unzueta Petronor Innovationeko Chief Innovation Officerraren iritzian, “garrantzitsuena, edo abantaila nagusia, hau da: ura sortzen du erregai gisa erabiltzen denean; oso neutroa da ingurunerako.” Baina, “hori abantaila izan dadin, aldez aurreko baldintza hau bete behar da: CO₂-a sortzen ez duen prozesu baten bidez sortu behar da hidrogenoa”.
• H2SITE TECNALIAren, Frantziako ENGIE enpresaren, Eindhoveneko Unibertsitatearen (Tue) eta TECNALIA Ventures Deep Tech Venture Builderraren arteko lankidetzatik sortutako spin-off bat da, etak zenbait lehengaitatik hidrogenoa bereizteko gai den mintz-erreaktore bat asmatu du; horri esker, industriek beren hidrogenoa eduki dezakete.

Andrés Galnares H2SITEko CEOaren iritziz, “hidrogenoa bateragarria da; oso ondo uztartzen da orain puri-purian dauden aldizkako energia berriztagarri guztiekin. Aldizkako energia berriztagarriaren soberakin hori sarean sartu beharrean, elektrolizatzaile batek erabiliko du hidrogeno bihurtzeko; gero, sarean sartuko da, eta kontsumituko den tokian bereiziko da. Eredu horretan sinesten dugu”. H2SITEren mintz-erreaktorearen bidez, “adibidez, gaur amoniakoa sartzen badugu erreaktorearen barruan, 0 karbonoko hidrogenoa sortuko dugu tokian bertan. Metanola sartzen badugu erreaktorearen barruan, berdin, 0 karbonoko hidrogenoa sortuko dugu tokian bertan”.

• BenortH2 garraiorako erregaia, elektrizitate garbia eta gas sintetikoa sortuko dituen eta martxan dagoen Hidrogeno Berdeko Espainiako lehenengo instalazioa da. Amaia del Villar White Summit Capitaleko Principalak eta erreportajean BenortH2 elektrolizazio-instalazioaren bozeramaileak ziurtatu duenez, hidrogenoa “funtsezko energia-bektorea da gaur egun alternatiba elektrikorik ez duten zenbait sektore deskarbonizatzeko. Este baterako, garraio astunaren sektorea eta bero handia behar duten industria-prozesu jakin batzuk. Hidrogeno berdea alternatiba ia paregabea da gaur egun sektore horiek deskarbonizatzen laguntzeko eta geure buruari ezarri dizkiogun deskarbonizazio-helburuak betetzeko”.

Hidrogenoari buruzko erreportaje osoa

• Esteka honetan ikus dezakezu erreportaje osoa: Hidrogenoa lehian dabil etorkizuneko energia bihurtzeko

Informazio gehiago

TEKNOPOLIS astero emititzen da, 1999az geroztik, eta Euskal Herriko zein Euskal Herritik kanpoko edukiak eskaintzen ditu.

Zientzia-dibulgazioa da Elhuyarren funtsezko oinarrietako bat. Haren garapen-eremuak hainbat arlo hartzen ditu: hizkuntza-teknologiak, ikerketa, komunikazio-arloko zerbitzuak, berdintasunaren, euskararen eta parte-hartzearen arloetako aholkularitza-zerbitzuak, itzulpenak eta abar.