"Hiri-logistika birpentsatzeko eta hiri jasangarriagoak lortzeko funtsezko topaketa bat egin da Zaragozan"
"Azken milia": hiri jasangarriagoak eta konektatuagoak lortzeko motorra
Hiri-logistika eraldaketa-prozesu betean dago. Entrega azkarren eskari gero handiagoak, emisioak murrizteko presioak eta salgaien banaketa hiri-ingurune konplexuetan integratzeko premiak azken milia kontzeptua birdefinitzera garamatzate. Logistika-katearen azken zati horri egozten zaizkio Espainiako garraioak sortzen dituen kostuen % 40 eta emisioen % 25, eta funtsezko elementu bihurtu da hiri eraginkorragoak, garbiagoak eta bizigarriagoak lortzeko bidean.
Testuinguru horretan, berrikuntza teknologikoa, sektore anitzeko lankidetza eta jasangarritasuna funtsezkoak dira salgaien hiri-banaketak dakartzan erronkei aurre egiteko. Hauek dira, besteak beste, erronka horiek:
pilaketak, trazabilitatea, digitalizazioa, automatizazioa, eta emisio txikiko eremuetara egokitzeko beharra.
Zaragoza: hiriko logistika birpentsatzeko topagune
Ikuspegi horrekin, Aragoiko ALIA Logistika Klusterrarekin batera, logistikaren, teknologiaren eta akademiaren sektoreetako funtsezko eragileak bildu genituen Zaragozan, salgaien hiri-banaketaren erronkei heltzeko, arreta azken milian jarrita batez ere. Helburua: esperientziak partekatzea, soluzio berritzaileak aurkeztea, eta elkarrekin proposamenak sortzea azken milia hori jasangarriagoa, eraginkorragoa eta konektatuagoa izan dadin.
Arrakasta-kasuak eta soluzio berritzaileak
Topaketan, arrakasta-kasuak aurkeztu ziren. Novaltiak, esate baterako, seguruagoa eta jasangarriagoa den farmazia-logistika baten aldeko apustua partekatu zuen, eta Ebocak erakutsi zuen digitalizazioak eta vending adimendunak erabiltzailearen esperientzia eta eraginkortasun operatiboa hobetu ditzaketela.
- Une gailenenetako bat SMART BAYS ekimenaren aurkezpena izan zen. UNIZARek, ALIAk eta TECNALIAk bultzatutako ekimen horrek hiriko zamalanetarako eremuen kudeaketa malgua eta konektatua proposatzen du.
- 2030erako hiri klimatikoki neutroak lortzeko Europako helburuekin bat egiten du ekimenak, eta hainbat gai jorratzen ditu, hala nola espazio egokien urritasuna, eskariaren zatiketa, eta sistema logistikoen arteko interoperabilitaterik eza.
Azken milia eraldatzeko baterako sorkuntza
Jardunaldiari amaiera emateko, baterako sorkuntzako tailer bat egin zen. Bertan, parte-hartzaileek soluzioak proposatu zituzten azken miliak aurrez aurre jartzen dizkigun egungo eta etorkizuneko erronka hauei aurre egiteko: pilaketak, emisioak, trazabilitatea, digitalizazioa, automatizazioa eta robotika.
Elkarlanerako gune horri esker, ekimen eraldatzaile bihurtu daitezkeen ideiak sortu ahal izan ziren.
TECNALIAn, soluzioak sustatzen jarraitzen dugu gure hirietarako logistika-eredu eraginkor, erresiliente eta jasangarriagoak sortze aldera. Hiri-logistika eraldatzea erronka partekatua da. Eta topaketa hau beste urrats bat izan da soluzio erreal, jasangarri eta kolaboratiboak lortzeko.